O Concello inviste 150.000 euros para mellorar unha zona que contará con paso de viandantes elevado e novos espazos verdes
O Concello inviste máis de 150.000 euros en mellorar a accesibilidade no treito de Alfonso Molina que conflúe na avenida Linares Rivas, unha intervención que se centrará, moi especificamente, no itinerario peonil que conecta as rúas Fernández Latorre, José Cornide e Ramón de la Sagra.
As obras de reurbanización dun dos pasos semafóricos máis transitados da contorna comezaron hoxe e suporán a renovación dos colectores pertencentes á rede municipal de saneamento e, a posteriori, tras a instalación das tubaxes, a disposición dun novo pavimento nas beirarrúas, máis moderno con materiais máis resistentes que os actuais e baldosas diferenciadas para facilitar o tránsito das persoas con mobilidade ou visibilidade reducida.
Neste sentido, o Concello aproveitará esta intervención para substituír os bolardos que hai nesta parte da avenida en sentido de entrada á cidade. No seu lugar, o Concello habilitará un parterre axardinado.
A concelleira de Infraestruturas e Mobilidade, Noemí Díaz, destacou esta medida “porque amosa que é posible mellorar moitos espazos públicos da cidade apostando por humanizalos”. A intervención enmárcase dentro do plan de melloras viarias en todos os barrios da cidade posto en marcha polo Goberno de Inés Rey. Díaz lembrou que a renovación dese punto permitirá tamén ampliar o carácter urbano do último tramo de Alfonso Molina, onde estes días se están a realizar tamén traballos de reparación na mediana.
A isto sumarase outra medida moi importante en materia de seguridade viaria: a elevación do paso peonil entre Fernández Latorre, José Cornide e Ramón de la Sagra, contribuíndo así ao calmado do tráfico neste punto da avenida, unha das principais portas de acceso e saída de vehículos na cidade.
