Concello de Carballo e Cáritas renovan o convenio anual para o mantemento do centro de día de Verdillo

O alcalde, Daniel Pérez, asinou hoxe o convenio de colaboración entre o Concello de Carballo e Cáritas Parroquial para o mantemento do centro de día Fogar de Bergantiños, situado en Verdillo. Ademais de Daniel Pérez, ao acto asistiu a concelleira de Servizos Sociais, Igualdade e Sanidade, Maica Ures, en representación do executivo local, mentres que por parte da entidade social participaron o párroco de Carballo, José García Gondar, e a educadora social de Cáritas, Maite Prieto.
O Concello colaborará no mantemento do centro de día cunha achega de 15.000 euros, que Cáritas poderá complementar, se fose preciso, con outras subvencións. A cambio, Cáritas comprométese a desenvolver a actividade conforme á normativa vixente e, entre outras medidas, facilitará o acceso ao servizo de persoas propostas pola área municipal de Servizos Sociais.