• O encontro abordará a través de varios relatorios temas prioritarios como muller, mocidade e igualdade, economía local, deporte, benestar e vivenda
• Izaskun García: “É o momento de crer neste proxecto e de demostrar que estamos preparados para gobernar Culleredo e lograr que o noso concello recupere o rumbo, a estabilidade e a ilusión”
O Partido Popular de Culleredo celebrará este sábado 28 de febreiro, a partir das 11.00 horas, o seu II Congreso Local baixo o lema “Contigo, Culleredo decide”, con Izaskun García como candidata. Con esta cita, que terá lugar no Edificio de Servizos Múltiples do Burgo, o PP local quere reforzar o seu equipo, consolidar o seu proxecto e saír “máis preparados” para ofrecer aos veciños unha alternativa de goberno solvente, seria e crible,
A formación popular afronta este congreso, máis que como un trámite orgánico, como unha oportunidade para converter o traballo desenvolvido nos últimos anos –nos barrios e nas parroquias, escoitando e recollendo os problemas e necesidades reais– nun proxecto con rumbo, listo para liderar o cambio que unha maioría social reclama en Culleredo.
Para Izaskun García, o PP de Culleredo chega a esta cita “máis unido, máis forte e máis preparado que nunca, tras unha etapa de oposición responsable, firme e útil e de estar á beira da xente, con presenza constante onde hai que estar”.
Neste sentido, García explica que o congreso servirá para consolidar un proxecto recoñecible, baseado na boa xestión, o sentido común, a defensa do interese xeral e o respecto ao diñeiro público, e para trasladar unha mensaxe clara: “Hai alternativa e hai futuro”. “Este congreso é o impulso para liderar o cambio de rumbo que reclama Culleredo: con seriedade, estabilidade e confianza”, sinala a candidata, que defende un Concello “que volva funcionar como ferramenta ao servizo da xente” e que abra oportunidades para mozas, familias e maiores. A candidata aproveitará a cita para presentar aos membros do equipo que a acompañan nesta nova etapa.
Ademais, como parte do programa, o congreso incluirá un bloque de relatorios centrados en asuntos clave para Culleredo co obxectivo de ordenar prioridades e reforzar o contido do proxecto local. As intervencións abordarán temas como muller, mocidade e igualdade, economía e comercio, deporte e benestar, e vivenda.
O PP de Culleredo fai, ademais, un chamamento a afiliados, simpatizantes e veciños para que o congreso local do sábado sexa un punto de encontro e mobilización, e para seguir construíndo “xuntos” unha alternativa que, fronte á improvisación e as escusas, ofreza xestión, responsabilidade, transparencia e ganas de mellorar Culleredo, nunha nova etapa marcada por un PP cohesionado, cun liderado claro e preparado para gobernar: “É o momento de crer neste proxecto e de demostrar que estamos preparados para gobernar Culleredo e lograr que o noso concello recupere o rumbo, a estabilidade e a ilusión”.
