A concelleira destacou o compromiso do Goberno de Inés Rey co impulso do talento mozo e a innovación empresarial
A concelleira de concelleira de Emprego, Comercio e Mercados, Diana Cabanas, participou esta noite en Palexco a XIV edición da Gala do Premio Xove Empresaria/o e Iniciativa Emprendedora de Galicia, un evento organizado pola Asociación de Xoves Empresarios (AJE) Galicia. Cabanas destacou a importancia que ten para o Goberno de Inés Rey a potenciación do talento emprendedor para o crecemento económico e a consolidación da cidade como referente innovador en Galicia.
“A Coruña está a vivir un momento de transformación e consolidación como referente económico. O noso obxectivo é seguir apostando pola especialización, a innovación e a captación de talento”, sinalou Sobral Cabanas. A concelleira destacou tamén datos que reflicten o dinamismo da cidade, como o crecemento poboacional por riba dos 250.000 habitantes e os niveis históricos de redución do desemprego. Ademais, puxo en valor proxectos estratéxicos como a Cidade das TIC e a Axencia Española de Supervisión da Intelixencia Artificial (Aesia), que reforzan a posición da Coruña na transición dixital e tecnolóxica. Cabanas recordou que o Concello ten dous viveiros de empresas e que precisamente acaba de se modificar a ordenanza para darlle máis facilidade aos emprendedores e emprendedoras que queren poñer en marcha un proxecto empresarial na cidade.
A gala contou coa presenza do presidente de AJE Galicia, Luciano Covelo; a presidenta de AJE A Coruña, Eva Rosende; o conselleiro de Emprego, Comercio e Emigración da Xunta de Galicia, José González; e o presidente da Deputación da Coruña, Valentín G. Formoso.
A concelleira participou na entrega de premios, destacando a importancia do apoio institucional para fomentar o emprendemento e consolidar un ecosistema innovador na cidade. “Emprender é non resignarse, é actuar con rebeldía e inconformismo. Desde a administración seguiremos apoiando
todas aquelas iniciativas que permitan construír unha cidade moderna, competitiva e con futuro”, salientou Sobral Cabanas.
