O sábado 5 de abril chega “Together to get there”, de Lali Ayguadé, e o domingo 6 preséntase unha proposta para público familiar con Roser López Espinosa
Primavera enDanza continúa coas súas propostas nesta primeira semana de abril, mes que celebra o Día Mundial da Danza o martes día 29. O programa presenta dous espectáculos con aires internacionais, ben porque se teñen presentado fóra de España, ben porque contan con presenza xaponesa ou alemá na súa creación ou produción. Hai que lembrar que Primavera enDanza é un dos ciclos de danza contemporánea máis importantes de Galicia, e o que ten máis longa traxectoria despois de 23 anos de vida, traendo sempre a Carballo as mellores compañías galegas e do resto de España.
O sábado 5 de abril chega desde Cataluña Together to get there, de Lali Ayguadé. Un encontro entre dous, un abrazo, o sentir do outro, a comunicación sen palabras, o sentir inmerso nun mundo creado entre dous. Un tempo que se expande e se detén como se nunca fora a acabarse. Lali Ayguadé é unha das referencias da danza contemporánea en España, sendo a primeira vez que actúa en Primavera enDanza para presentar unha proposta de transformación. Onde nun instante esquécense e saen á luz as diferencias; os polos opostos, a fraxilidade e a forza; o deixarse caer e o desexo polo control. O equilibrio e a inestabilidade. A verdadeira natureza humana.
Akira Yoshida e Lali Ayguadé son os encargados da dirección artística e da interpretación desta peza. Akira é un bailarín navarro con raíces xaponesas que comezou co breaking e co paso do tempo abriu as súas portas á danza contemporánea e ás artes escénicas. Actualmente combina xiras de traballo propio con xiras con outras compañías e obradoiros por todo o mundo en festivais como DeltebreDansa, B12, Kalamata International Dance Festival, Flip Helsinki, Portugal Summer Intensive, etc. Lali Ayguadé formouse no Institut del Teatre de Barcelona e P.A.R.T.S. Comezou a traballar en Dinamarca coa compañía Publik Eye e coa dramaturga Carmen Mehnert antes de unirse á Akram Khan Company e Hofesh Shechter en Londres. Protagonizou a curtametraxe Timecode, que foi galardoada coa
Palma de Ouro no Festival de Cannes, e recibiu, entre outros, premios Goya e Gaudí, ademais de ser finalista dos Oscar. Ten impartido obradoiros en lugares como o Centre National de la Danse (París), SEAD (Salzburgo), Budapest Contemporary Dance Academy, etc.
A cita para ver Together to get there é o sábado 5 de abril ás 20.30 horas no Pazo da Cultura. A duración prevista do espectáculo, dirixido a público adulto, é de 50 minutos. O prezo da entrada é de 7 €, 4 € con prezo reducido. Colabora a Rede Galega de Teatros e Auditorios.
O domingo 6 de abril é a quenda para o público familiar en Primavera enDanza desde Cataluña con Cometa, de Roser López Espinosa en coprodución coa asociación de artes escénicas alemá Vorpommern tanzt an. Unha cosmonauta, cun casco na man, sobre un transbordador espacial. Así é Cometa, unha viaxeira inesperada que nos invita a mirar o noso entorno con ollos novos. Os máis cativos e cativas, desde dentro do escenario, gozarán dunha aventura galáctica que nos redescubrirá a gravidade e o poder da empatía, grazas á xeometría e á velocidade da luz. A bailarina e creadora Roser López Espinosa combina con mestría o xogo físico, os elementos acrobáticos e o amor polo detalle, creando un imaxinario cheo de xogo cun toque de humor. En Cometa, a súa primeira creación para público xuvenil, envía aos nenos a unha viaxe de aventura e imaxinación que comeza no escenario e remata nunha galaxia descoñecida chea de sorpresas.
O traballo coreográfico de Roser López Espinosa baséase nun forte físico, cunha gran paixón pola precisión, a delicadeza, os elementos acrobáticos e o detalle. Complicidade e traballo en equipo van da man nun imaxinario vital e lúdico, cunha poesía refinada e un toque de humor. Licenciada en Danza Contemporánea pola MTD / Amsterdam School of the Arts, recibiu en 2005 a bolsa danceWEB do festival ImpulsTanz de Viena e posteriormente formouse co antigo adestrador olímpico Jaume Miró en Barcelona. En 2021 estrea Cometa en coprodución con Vorpommern tanzt an. Continúa de xira con esta proposta desde entón, con máis de 180 actuacións en festivais e teatros de todo o mundo.
A cita para ver Cometa é o domingo 6 de abril ás 18.00 horas no Pazo da Cultura. A duración prevista do espectáculo, dirixido a público familiar (nenas e nenos de entre 6 e 10 anos), é de 60 minutos. O prezo da entrada é de 7 €, 4 € con prezo reducido. Colabora a Rede Galega de Teatros e Auditorios.
ENCONTROS CO PÚBLICO
Hai que lembrar que, como en cada edición de Primavera enDanza, o programa mantén o seu espírito didáctico, xa que os creadores e creadoras e intérpretes contarán todas as claves da súa proposta ao remate de cada peza nun encontro co público. Así ten sucedido xa nas dúas primeiras propostas do programa, na que os asistentes puideron falar cos e coas protagonistas dos espectáculos.
As entradas para todas as citas están á venda en <billeteira.carballo.gal> a un prezo moi asequible. Tamén será posible a venda directa o mesmo día do espectáculo na billeteira do Pazo da Cultura dende 90 minutos antes da actuación.
