As nacionalistas reclaman accións inmediatas para garantir espazos seguros para a infancia e poñen o foco tamén no deterioro do Centro de Interpretación do Medio Mariño, o paseo marítimo e as parroquias
O BNG de Cabanas denuncia o abandono continuado dos parques infantís do municipio, onde se acumulan deficiencias graves como columpios sen ancorar, bambáns sen asentos, xogos rotos ou cordas que non se repoñen. “Estamos a falar de espazos pensados para a infancia, que deberían ser seguros e estar en bo estado, e que hoxe son a imaxe da incapacidade e do pasotismo do goberno municipal”, sinalan as nacionalistas.
Desde o BNG lembran que levan “ano e medio” reclamando solucións sen que o executivo local adoptase medidas efectivas. Ademais, advirten de que o problema vai máis aló dos parques infantís, xa que o abandono afecta a infraestruturas municipais de todo tipo: dende o Centro de Interpretación do Medio Mariño, cheo de pintadas, ata o paseo marítimo e diferentes equipamentos das parroquias.
“O abandono é xeralizado e afecta á calidade de vida da veciñanza”, conclúen, reclamando actuacións inmediatas e unha planificación seria para reverter unha situación que, ao seu ver, é inaceptable nun concello como Cabanas.
