Inés Rey: “Recorreremos a sentenza xa que non é de xustiza indemnizar o ilexítimo dono do pazo”

Sinalou que “os servizos xurídicos municipais xa están traballando neste anuncio de recurso de casación”
A rexedora confirmou que “é de xustiza manter a mesma posición durante todo o proceso, até o final” e aclarou que a posición procesual do Concello da Coruña “é autónoma”
O Concello da Coruña recorrerá contra a sentenza da Audiencia Provincial que confirma que o pazo de Meirás é patrimonio público, aínda que ordena ao Estado a pagar aos descendentes do ditador Francisco Franco como posuidores de boa fe polos “gastos útiles e necesarios desde 1975”.
“Recorreremos a sentenza xa que non é de xustiza indemnizar o ilexítimo dono do pazo”, así o anunciou a alcaldesa, Inés Rey, que sinalou que “respectamos as posicións procesuais de todas as partes, pero o noso compromiso é firme”.
Así, o Concello da Coruña confirma a presentación deste recurso do mesmo xeito que fixo o Concello de Sada e a Deputación da Coruña. Rey tamén informou de que os servizos xurídicos municipais “xa están traballando” neste recurso.
A rexedora confirmou que “é de xustiza manter a mesma posición durante todo o proceso, até o final” e aclarou que a posición procesual do Concello da Coruña “é autónoma” e que, polo tanto, cada administración presentará o seu correspondente recurso de casación.
Por outra banda, a alcaldesa lembrou o impulso do Concello para a recuperación da Casa Cornide ao patrimonio público. Neste senso, o Concello encargou varios informes xurídicos, históricos e artísticos para, por unha banda, solicitar á Xunta a declaración do inmoble como BIC e, por outra, iniciar unha demanda xudicial para recuperar a Casa Cornide que, segundo a alcaldesa, avala, presuntamente, a ilegalidade dos distintos procedementos que levaron a que o edificio fose vendido a Carmen Polo. Inés Rey sinalou que “a Casa Cornide sempre pertenceu ao patrimonio público ata que nunha poxa de dubidosa legalidade regalouse á familia Franco, que entendía que o patrimonio público era susceptible de engrosar o seu patrimonio privado”.