Miño prorrogará ata maio o decreto para habilitar a superficie de terrazas exteriores e aumentar así o número de mesas e cadeiras

Este punto tratarase no Pleno da próxima semana, para favorecer así as condicións de traballo dun dos sectores máis castigados pola pandemia.
O Concello de Miño planea prorrogar ata o 9 de maio, data de vixencia do Estado de Alarma, o decreto que regula a habilitación da superficie de terrazas exteriores, aumentando así as posibilidades de colocación de mobiliario nos establecementos que conten con esta instalación.
Este punto tratarase no Pleno da próxima semana, e búscase con isto favorecer as condicións de traballo dun dos sectores máis castigados pola pandemia: a hostalería local.
Cabe lembrar que esta proposta recollía que o espazo entre cadeiras das distintas mesas respectaríase sempre, así como que o aumento do espazo peonil sería proporcional no mesmo tramo da vía pública onde se sitúa a terraza.
Permitía, á súa vez, ampliar as zonas autorizadas coa correspondente eliminación de prazas de aparcamento naqueles casos que se considerase necesario, e no espazo aumentado só pódense utilizar elementos coas mesmas características e dimensións que as existentes, nunca superando o número de elementos determinados.
Esta medida será temporal, sempre que se manteñan as recomendacións das autoridades sanitarias derivadas da covid-19, e desde o goberno local aseguran que “é noso deber facilitar as condicións da hostalería local, un dos sectores máis damnificados durante a pandemia, unha crise que é sanitaria, pero que sen dúbida tamén o é en materia económica”, aseguran.