O Concello de Neda iniciaba hoxe a habitual campaña de control da vexetación espontánea en cunetas, noiros e plataformas das pistas e estradas de titularidade municipal. A finalidade da intervención non é outra que mellorar a seguridade de condutores e peóns, e minimizar o risco de incendios.
As tarefas contratadas consistirán na roza mecanizada de especies herbáceas, plantas, arbustos… que medran nas marxes das vías públicas da localidade, estreitando, nos puntos menos transitados, a súa plataforma, e reducindo a visibilidade das persoas usuarias deses camiños.
Durante as próximas semanas, un tractor con rozadora de brazo lateral porá a punto 60 quilómetros de camiños de acceso a lugares, dando prioridade a aqueles puntos con máis residentes. A zona entre Fábrica do Monte e A Silva foi o primeiros obxectivo.
Os traballos reforzarase proximamente coa incorporación dos tres peóns/peoas do APROL Rural, que se ocuparán, entre outras accións, das rozas a man naqueles tramos da rede viaria nos que sexa inviable realizar os tarefas con medios mecánicos.
O obxectivo do goberno local e da empresa adxudicataria dos traballos é ter a punto ao longo deste mes a totalidade das pistas que dan acceso a lugares habitados do municipio.
Ademais, en virtude do convenio subscrito con Medio Rural e Seaga, o Concello de Neda beneficiarase de actuacións en vías, cun máximo de 12 quilómetros durante este ano. Intervencións que se realizarán en camiños situados en zonas forestais.
