A deputada nacionalista, Iria Carreira, denuncia que o recorte forma parte do desmantelamento da atención primaria do PP
A profesional atendía ademais aos concellos da Baña e Mazaricos que tamén son derivados a Muros e Santiago no que para o BNG afonda na “desigualdade xeográfica” da sanidade pública
O BNG defenderá no Parlamento a restitución inmediata da atención de nutricionista nos centros e Santa Comba e Negreira que consultaba tamén a pacientes de Mazaricos e A Baña. Co recorte de profesionais da Consellaría de Sanidade, as persoas de Santa Comba e Mazaricos son redirixidas a Muros e as de Negreira e A Baña ao centro de Fontiñas en Compostela.
O BNG ven de trasladar ao Parlamento a través de varias iniciativas a restitución da nutricionista que consultaba pacientes dos concellos de Negreira, Santa Comba, A Baña e Mazaricos. A deputada nacionalista, Iria Carreira, denuncia que as persoas que eran atendidas por esta profesional teñen agora que trasladarse a Muros e Santiago polos recortes na atención primaria do goberno do PP. Alerta ademais da sobrecarga de traballo que suporá para as profesionais dos centros de saúde que terán moita máis demanda ao incorporar cada un deles a correspondente a dous dos concellos afectados.
Coa eliminación da profesional, pacientes de Santa Comba e Mazaricos serán atendidas en Muros e as de Negreira e A Baña no centro das Fontiñas de Santiago. “A fenda territorial é enorme e a distancia que teñen que percorrer moi grande por iso esiximos a inmediata restitución desta profesional”, engade Iria Carreira.
Para a deputada nacionalista, o tempo que levan as nutricionistas na atención primaria demostraron a súa eficacia na mellora da saúde da poboación e os recortes actuais significan “darlle ás costas á calidade de vida da veciñanza e, en especial, á de concellos como os afectados pola eliminación da profesional que atendía en Negreira e Santa Comba que terán que recorrer moitos quilómetros para ter atención, incrementando así a desigualdade xeográfica existente”.
Menos da metade de nutricionistas no último recorte de Sanidade
Ademais de iniciativas dirixidas á restitución da profesional que afecta a estes catro concellos, o grupo nacionalista está a reclamar tamén no Parlamento a restitución e ampliación do cadro de nutricionistas que se reduciron no actual recorte da Xunta de 95 a 45 en todo o país. Para o BNG estas profesionais son claves para instaurar hábitos saudábeis e aumentar a calidade de vida da poboación.
“A Xunta decide, unha vez máis, recortar en atención primaria, neste caso, eliminando ás nutricionistas que están moi ben valoradas tanto entre as pacientes como no resto dos profesionais”, lamenta a médica e deputada do BNG, Iria Carreira, para quen esta medida demostra que “o PP non aposta por equipos multidisciplinares por moito que o diga en notas de prensa e decide seguir deteriorando a sanidade pública”. Para Carreira, a atención de nutricionistas supón a mellora dos datos e saúe da poboación xa que “a súa actividade céntrase maioritariamente na prevención de patoloxías que poden ser graves ou crónicas”
O BNG esixiu xa á Consellaría de Sanidade a restitución da nutricionista nunha concentración que tivo lugar o pasado 13 de marzo en Negreira na que participaron representantes nacionalistas dos concellos implicados e do grupo parlamentar, entre os que se atopaba a deputada Iria Carreira, que agora defenderá as iniciativas presentadas no Parlamento.
