Arteixo conta co ecosistema preciso para acoller con garantías este organismo.
Os nacionalistas preguntarán polo mantemento do mobiliario do paseo fluvial
O BNG de Arteixo leva ao vindeiro pleno de Arteixo, que se celebra este xoves 28 de abril, unha moción relativa á solicitude de instalación no concello de Arteixo da Axencia Estatal de Supervisión de Intelixencia Artificial.
O pasado 22 de marzo o Ministerio de Política Territorial publicou no BOE o Real Decreto 209/2022 polo que establece o procedemento para a determinación das sedes físicas das entidades pertencentes ao sector público institucional estatal. Este Real Decreto facilita e fomenta a descentralización na asignación destas sedes e crea unha oportunidade para Galiza neste eido. Neste marco crearase a Axencia Española de Supervisión de Intelixencia Artificial. O BNG considera que Arteixo xunta as características axeitadas para albergar esta axencia xa que na súa propia área metropolitana dispón dunha Facultade de Informática que, probablemente, terá o grao e mestrado de IA. Ademais, o municipio conta cun tecido empresarial potente e innovador. Por outra banda, impulsaría o reto demográfico galego, as políticas de creación de emprego e o papel do sector tecnolóxico como vertebrador do territorio.
O BNG propón ao Pleno instar á Xunta de Galiza para que solicite a instalación da “Axencia Española de Supervisión de Intelixencia Artificial” no territorio galego e ofrecer o Concello de Arteixo como sede para a citada Axencia.
Por outra parte, máis aló da política local, trala decisión do goberno español de asumir a postura de Marrocos de non respectar o dereito de autodeterminación do pobo saharauí, o BNG mostra o total rexeitamento á mesma e propón ao Pleno mostrar o seu firme apoio ao pobo saharauí no exercicio do seu dereito de autodeterminación e independencia, así como esixir do Goberno español a rectificación da decisión de asunción da posición e discurso da ditadura marroquí sobre o Sáhara Occidental e que esixa a Marrocos o cese inmediato da violación dos dereitos humanos da poboación.
Rogos e preguntas
O BNG de Arteixo preguntará se o Goberno sabe cantas persoas refuxiadas ucraínas chegaron ao municipio e se ten prevista algunha axuda para elas.
Os nacionalistas tamén demandarán, de novo, a documentación sobre a restauración e situación da canteira de Vilarrodís. Pedida xa en marzo, cando o concelleiro de Urbanismo asegurou que ía mandala.
Finalmente, o BNG rogará que, á maior brevidade posible, o Concello subsane o mal estado do mobiliario do paseo fluvial, para ofrecer unha maior seguridade á veciñanza. Ademais, os nacionalistas rogan a eliminación da cita previa no Concello de Arteixo para trámites administrativos, en tanto os prazos actuais limitan as xestións dos usuarios.
