O temporal non foi quen de adiar a tan desexada inauguración do novo Centro Social de Carreira, unha infraestrutura moi demandada pola veciñanza desta parroquia cun histórico vagaxe cultural. Ao acto de inauguración asistiron, o alcalde, Luís Pérez, a deputada de Política Social da Deputación da Coruña, Mar García, os tenente de alcalde, os concelleiros e concelleiras da Corporación Municipal e Marivén Sampedro, presidenta da Asociación de Veciños de Carreira.
Nunhas dependencias ateigadas de veciños e veciñas de Carreira descrubiuse a placa conmemorativa ao son do grupo “Airiños da Guía” para despois dar paso ás Pandereteiras de Carreira que introduciron os discursos das autoridades presentes.
Marivén Sampedro presidenta da asociación de Veciños de Carreira mostrou a satisfacción en nome da veciñanza por inaugurar este centro social tan demandado e ofreceu a colaboración da asociación para poder desenvolver a actividade cultural da parroquia.
Por outra banda, Mar García puxo en valor a achega económica da Deputación para desenvolver proxectos no rural e sinalou “que a apertura do edificio é a posta en marcha dun espazo de encontro, de convivencia e de oportunidades para toda a veciñanza”, e tamén fixo referencia á lonxevidade do proxecto pero como di o refrán, a espera pagou a pena porque Carreira conta por fin cun espazo á altura das súas necesidades”. Para rematar animou a facer do centro un lugar vivo, dinámico e participativo, un espazo no que cada persoa atope o seu sitio e no que a comunidade siga fortalecéndose”.
Para finalizar o acto tomou a palabra o alcalde de Ribeira: “hoxe é un día de inmensa alegría e orgullo para toda a parroquia. Despois de moitos anos de esforzo, espera e soños compartidos, temos a honra de inaugurar este Centro Social, unha infraestrutura que simboliza a nosa determinación por mellorar a calidade de vida e fortalecer os espazos de socialización para a veciñanza. Agradecer a implicación dos obradoiros de emprego Vionta e Tahúme, encargados de comezar esta infraestrutura, así como á Deputación pola súa contribución económica”.
O rexedor destacou que o novo centro social ocupará un lugar central na vida comunitaria con espazos para actividades sociais, culturais e recreativas. “Vai atender as necesidades de todas as xeracións: desde as nenas e nenos que desfrutarán do parque cuberto, até as persoas maiores que atoparán aquí un lugar acolledor”.
