A convocatoria, dirixida ao alumnado dos centros educativos coruñeses que cursa actualmente o cuarto ano de Secundaria, permitirá que as e os beneficiarios vivan o seu primeiro ano de Bacharelato en Canadá
O Concello da Coruña abrirá este mércores 5 o prazo de solicitude das Bolsas Norteamérica 2026-27, que inclúe unha oferta de 30 prazas para que as alumnas e alumnos dos centros educativos coruñeses que cursan 4º da ESO este ano poidan darlle continuidade á súa formación no Canadá durante o curso 2026-27, no seu primeiro ano de Bacharelato.
A posta en marcha deste programa supuxo un fito para o Concello, que foi pioneiro na creación desta iniciativa. As bolsas permiten que o alumnado dos centros educativos coruñeses, teña, ano tras ano, a posibilidade de cursar estudos no estranxeiro, adquirindo un dominio avanzado da lingua inglesa e, de paso, coñecendo e vivindo polo miúdo a cultura e sociedade do país de acollida.
O concelleiro de Educación, Formación e Innovación Tecnolóxica, Juan Ignacio Borrego, lembrou que “o Goberno de Inés Rey deu continuidade a este programa educativo, un dos mais populares, co obxectivo de garantir que a mocidade coruñesa poida gozar de experiencias únicas”. Tal e como se detalle nas bases, xa dispoñibles na web do Concello, haxa dous tipos de bolsa:
● Bolsa con cobertura total: serán beneficiarias e beneficiarios as rapazas e rapaces que obteñan unha puntuación en relación á situación económica da unidade familiar nuclear comprendida entre 7 e 10 puntos.
● Bolsa con cobertura parcial: o Concello asumirá un mínimo do 65% e un máximo do 95% do custo da praza da alumna ou alumno seleccionado. Isto quere dicir que, en ningún caso, as familias terán que achegar máis do 35% do custo da praza.
O prazo de inscrición pecharase o 18 de novembro
O programa ofrece a estadía no Canadá durante o período correspondiente ao ano académico, tamén a tramitación e obtención do visado de entrada no país. Ademais, a bolsa inclúe as viaxes de ida e volta desde A Coruña á poboación de destino no Canadá, asistencia sanitaria e 120 euros mensuais durante os meses de estadía, en concepto de axuda á manutención. Ademais, haberá unha achega de 400 euros para o alumnado con menos recursos económicos. Esta achega avaliarase previamente polos servizos sociais municipais.
As solicitudes poderán presentarse a partir do mércores de novembro e ata o martes 18 de novembro, ambos os días incluídos. O primeiro paso será cubrir unha ficha específica de inscrición a través da web de Educación, que deberá presentarse posteriormente, acompañada por toda a documentación requirida, a través dos rexistros oficiais do Concello.
