• A área comercial contará cun deseño sostible e integrado na paisaxe, ocupará unha superficie de máis de 1.500m2 e terá un aparcamento con capacidade para 48 vehículos.
O alcalde de Miño, Manuel Vázquez Faraldo, e a delegado da área de Coruña de GADISA, Baltasar López Lamas, asinaron esta semana #ante o notario de Pontedeume o contrato para a concesión a GADIS da superficie comercial de Costa Miño. Está previsto que soliciten a licenza de obra nas próximas semanas.
O proxecto que levará a cabo destaca pola súa integración urbana, o seu deseño arquitectónico coidado e a súa aposta pola sustentabilidade ambiental. O establecemento contará con servizo de atención directa en peixaría, carnicería e charcutería. A concesión do espazo terá unha duración de 30 anos e a parcela contará cun acceso principal pola Avenida de Xarío e unha saída pola rúa A Madanela, o que garante unha circulación fluída e segura para vehículos e peóns.
A edificación proxéctase sobre unha parcela de 3.511,98 metros cadrados delimitada polas rúas Camposas (nordés), Madanela (noroeste), Cepeira (suroeste) e Avenida de Xarío (sueste). O deseño busca integrarse de maneira harmoniosa coa contorna urbana existente, adoptando unha planta rectangular e unha cuberta a dúas augas oculta tras muros perimetrais, o que confire ao edificio unha imaxe arquitectónica limpa e equilibrada.
O inmoble implantarase nunha ladeira, semienterrado, cunha altura total aproximada de sete metros, inferior ao máximo permitido e similar á dunha vivenda unifamiliar. Esta integración minimiza o impacto visual e preserva as vistas e a entrada de luz das vivendas próximas.
O edificio desenvolverase en planta baixa e unha pequena entreplanta, cunha superficie construída total de 1.518,35 metros cadrados, dos cales 1.314,97 corresponden á planta baixa, 123,47 á entreplanta e 79,91 á terraza. Nesta última situaranse as instalacións exteriores que darán servizo ao supermercado, quedando ocultas e illadas acusticamente para reducir o impacto sonoro e visual sobre a contorna.
O proxecto inclúe un aparcamento con capacidade para 48 prazas de 2,5 por 5 metros, que representa o 50,6% da superficie total da parcela. A edificación ocupará o 37,44%, mentres que o 11,96% restante destinarase a zonas urbanizadas e axardinadas.
A actuación contempla ademais o axardinamento dos noiros e retranqueos con especies autóctonas de baixo porte, así como a substitución das árbores enfermas ou deterioradas nas rúas Camposas e Cepeira, contribuíndo á mellora paisaxística e ambiental da zona.
Manuel Vázquez Faraldo lembra que “é unha gran nova para Miño, leste era un servizo moi demandado e moi necesitado debido ao crecemento poboacional que está a ter nos últimos anos Miño en xeral e Costa Miño en particular”.
