O Concello de Brión vén de iniciar as obras de construción dunha senda peonil na aldea de Chave da Ponte, na parroquia de Bastavales. Unha actuación que suporá un investimento de máis de 140.000 euros, realizado con cargo ao Plan Complementario 2024 da Deputación da Coruña.
O alcalde de Brión, Pablo Lago, que visitou a zona xunto a responsables da empresa adxudicataria dos traballos, explica que “a nosa intención é mellorar as seguridade viaria tanto de peóns, sobre todo dos veciños da aldea que teñen aquí a parada do autobús comarcal, como dos condutores, xa que se trata dunha zona moi transitada ao ser o punto de conexión entre unha estrada autonómica como a AC-300 Os Ánxeles-Picaraña e o desvío cara Vidal e Santiago”.
As senda peonil terá unha lonxitude de 470 metros e un ancho de 1,8 metros, delimitada exteriormente por un bordo de formigón e cunha base conformada por 20 centímetros de zahorra e 15 centímetros de formigón coloreado. Os primeiros traballos incluíron a habilitación do espazo preciso para a instalación dunha rede de canalización para a recollida de augas pluviais, que contará con 12 pozos de rexistro e 12 arquetas sumidoiro.
Baixo a senda tamén se instalará unha segunda tubaxe para a habilitación do alumeado público, coa colocación doutras 10 arquetas de alumeado. As obras inclúen tamén a mellora da estrada adxacente onde, ademais de proceder ao seu bacheo e mellora con aglomerado en quente, ampliarase no posible a súa anchura. Finalmente, contémplase a colocación de sinalización horizontal, co pintado de liñas de bordo e símbolos. Agárdase que as obras estean rematadas cara o verán.
