O Concello de Brión levará aos Reis Magos a facer un percorrido polas distintas parroquias do municipio entre as 10:30 e as 19:45 horas

Haberá lambetadas, chocolate e rosca para as persoas asistentes
O Concello de Brión cambiará o seu tradicional Festival de Reis no polideportivo municipal de Pedrouzos por dez visitas ás distintas parroquias do municipio, entre as 10:30 e as 19:45 horas de mañá martes 5 de xaneiro. Melchor, Gaspar e Baltasar farán as visitas a bordo dun autobús de época, repartindo lambonadas, chocolate e rosca, debidamente preparadas de xeito individualizado.
En cada unha das dez paradas programadas a rapazada poderá falar durante uns minutos coas súas Maxestades, entregarlles as súas cartas e pedirlles os seus agasallos, mantendo en todo momento as distancias de seguridade. Así, para evitar as aglomeracións, cada nena e neno só poderá estar acompañado por unha persoa adulta, levando máscara todos eles.
Horarios e puntos de encontro
As visitas da mañá terán como protagonistas ás parroquias da parte alta do municipio. Así, o percorrido dará comezo ás 10:30 horas, no cruceiro da Graña (Cornanda), para continuar nos adros das igrexas da Luaña (11:00 horas) e Viceso (11:45 horas). Na cuarta parada hai un cambio con respecto á programación orixinal, xa que coincide cun enterro, polo que se adía ata as 13:15 horas a visita ao adro da Igrexa de Ons e ata as 14:00 horas a visita na paraada do transporte escolar de Tembra.
O percorrido da tarde dará comezo ás 16:00 horas no adro da Igrexa de Bastavales, para continuar ás 17:00 horas na contorna da capela de San Salvador. Despois, a comitiva fará
dúas paradas na parroquia dos Ánxeles: ás 17:45 horas na contorna da capela do Tremo e ás 18:45 horas no adro da Igrexa dos Ánxeles. O percorrido rematará ás 19.45 horas na carballeira de Santa Minia.