O acordo foi aprobado cos votos a favor do PSOE e a abstención do PP.
Na sesión plenaria tamén se aprobou a ordenanza reguladora da venda ambulante, a concesión administrativa dos terreos en dominio público portuario do Club Náutico e o Plan Único 2021.
O Concello de Miño aprobou en pleno, cos votos a favor do PSOE e a abstención do PP, o convenio coa Sociedade de Xestión de Activos Procedentes da Reestruturación Bancaria ( SAREB) polo que esta entidade cederá 12 vivendas que o Concello ofertará en réxime de alugueiro social, co obxectivo de axudar aos seus veciños e veciñas que non poden acceder a un fogar a prezo de mercado.
Na sesión plenaria tamén se aprobou a aceptación da concesión administrativa dos terreos en dominio público portuario que recibe o Concello de Miño de Portos de Galicia e que corresponden ás instalacións do Club Náutico, co que se desbloquean así as obras de ampliación e remodelación do edificio.
Ademais, aprobáronse tanto o Plan Único 2021 como o Plan Único Adicional 1/2021 da Deputación dá Coruña. O Plan provincial supón nesta ocasión unha axuda para o Concello de Miño de 422.000 euros en total, que se dedicarán a sufragar obras, gastos sociais e correntes.
Doutra banda, aprobouse inicialmente cos votos a favor do PSOE e a abstención do PP a ordenanza reguladora da venda ambulante, que potenciará as feiras e os mercados creando unha regulación específica para dar máis seguridade aos vendedores.
Por último, ratificouse a adhesión ao convenio asinado entre a Vicepresidencia, a Consellería de Presidencia, Xustiza e Turismo e a Federación Galega de Municipios e Provincias (FEGAMP) para regular a xestión das sancións por temas COVID que impoñan os corpos de seguridade.
