A alcaldesa, Inés Rey, participou na entrega das Medallas de Ouro concedidas hoxe en María Pita aos investigadores María Fidalgo e Iván Fernández, así como á Cruz Vermella Española como entidade galardoada
A alcaldesa, Inés Rey, presidiu hoxe, no salón de sesións do Pazo Municipal de María Pita, o acto de entrega das Medallas de Ouro Conmemorativas da Batalla de Elviña 1809-2022, concedidas a María Fidalgo Casares, historiadora, investigadora e crítica de arte; a Iván Fernández Amil, investigador e articulista; así como á Cruz Vermella Española, representada no acto pola súa presidenta provincial, Mercedes Casanova, como a entidade galardoada.
Inés Rey, acompañada en María Pita por Manuel Arenas, presidente da Asociación Histórico Cultural Royal Green Jackets, amosou o seu agradecemento as e os galardoados nun acto cheo de simbolismo, ás portas de cumprirse o 213º aniversario da Batalla de Elviña —tamén coñecida como a Batalla da Coruña—, acontecida durante a Guerra de Independencia Española no ano 1809 no contexto das Guerras Napoleónicas.
A continuación, a alcaldesa encabezou o acto de ofrenda ao xeneral Sir John Moore e aos
caídos durante a Batalla da Coruña. A homenaxe levouse a cabo nos xardíns da Real Maestranza, coa presenza do presidente da Asociación Histórico Cultural Royal Green Jackets, Manuel Arenas; o xeneral xefe de Apoio á Maniobra, D. Juan Francisco Arrazola; e o director do Museo Militar da Coruña, o coronel D. Antonio Montero.
Xunto a estatua en homenaxe a Diego del Barco y de la Zendeja, heroe coruñés da Guerra
de Independencia, realizouse unha ofrenda floral ao xeneral británico Sir John Moore e
tamén aos falecidos na defensa da cidade durante a batalla, gardándose a continuación un
minuto de silencio polos caídos. Por último, e despois das salvas de mosquete, o acto rematou coa interpretación dos himnos de Francia, Gran Bretaña e España.
