· A xornada inclúe un roteiro pola parroquia de Ouces, onde naceu o autor, unha ofrenda floral, un coloquio, misa, actuación musical e petiscos.
· Para o roteiro literario habilitarase un autobús que dará servizo ás persoas que o necesiten.
· O ano 2025 foi bautizado polo Concello como ‘Ano Florencio Vaamonde’.
O Concello de Bergondo, xunto con outras institucións e colaboradores, homenaxeará este domingo, 19 de outubro, a Florencio Vaamonde Lores no ano do centenario do seu falecemento. O acto comezará ás 10 horas na capela de San Gregorio (Ouces) e finalizará no auditorio da Senra ao redor das 14 horas.
Así, ás 10 horas dará comezo unha misa en memoria de Florencio Vaamonde na capela de San Gregorio. Ao finalizar esta, ao redor das 10:30 horas, realizarase un roteiro literario pola parroquia de Ouces, lugar de nacemento do autor. O traxecto ten unha distancia de preto de 4 quilómetros e percorrerá diferentes lugares que foron importantes no seu desenvolvemento vital como a Casa Grande os Vaamonde, a fonte do Petisco, o Centro Social Antonio Pato Pardo (antiga escola), o castro de Reboredo ou a igrexa de San Xoán de Ouces. O Concello habilitará un autobús para aquelas persoas que non poidan seguir o itinerario a pé.
Ás 12:15 horas celebrarase un acto institucional de homenaxe con ofrenda floral na igrexa de San Xoán de Ouces. Logo, ás 13 horas no audiorio da Senra levará a cabo un coloquio con Isabel Seoane e Teresa Amado, estudosas da obra e o legado de Florencio Vaamonde Lores.
Para finalizar a xornada haberá unha actuación musical de Manoel de Felisa e petiscos para as persoas asistentes.
Ano Florencio Vaamonde
O Concello de Bergondo nomeou o ano 2025 como ‘Ano Florencio Vaamonde Lores’, en homenaxe a unha das figuras máis relevantes da literatura galega do século XIX que naceu na parroquia de San Xoán de Ouces o 2 de abril do ano 1860.
O goberno local continúa así co seu proxecto para poñer en valor a autores e autoras ilustres relacionadas co municipio, despois de celebrar no 2024 o ‘Ano Xoán Vicente Viqueira’. Está previsto que en 2026 as figuras homenaxeadas sexan as de Filomena Dato e Alejandro Pérez Lugin.
Co obxectivo de poñer en valor a obra de Florencio Vaamonde Lores creouse un imagotipo específico que se usa, desde o 1 de xaneiro de 2025, en todas as comunicacións oficiais do Concello de Bergondo.
O imagotipo deseñado realizouse coa idea de evocar, a través de diferentes elementos visuais, a esencia da época na que viviu o autor, o seu estilo e legado cultural. Para iso utilizouse unha tipografía serifa, que reforza esa conexión cultural, e representouse, a través dun símbolo, ao autor sentado, en posición serena e reflexiva, evocando o seu intelecto e o contexto cultural galego no que se relacionaba. Xuntos, estes elementos comunican con forza a esencia do personaxe homenaxeado e o seu legado, creando unha identidade visual sólida.
Florencio Vaamonde Lores
Criado no seo dunha familia nobre, Florencio Vaamonde pasa a súa infancia entre San Xoán de Ouces e A Coruña, onde traballou como funcionario de Facenda e consagrou o seu tempo para consolidar as letras galegas e a dignificar a lingua nacional.
No ano 1897 participou participou na fundación da liga Galega, unha organización política presidida por Manuel Murguía e dirixida por un comité formado por Lugrís Freire, Salvador Golpe e Carré Aldao que redactou os seus estatutos completamente en galego. O 4 de setembro de 1905, Vaamonde Lores participou na fundación da Real Academia Galega. No ano 1907 contribuíu á constitución de Solidariedade Galega e en 1916 participou na fundación das Irmandades da Fala.
Na súa faceta como estudoso, publicou artigos de carácter histórico en diferentes xornais como A Fidelidade, Revista Galega ou O Tribuno. Como poeta, continuou a escola formalista liderada por Eduardo Pondal e publicou algúns poemarios. En prosa cultivou a novela de costumes, mentres se manifestou como rigoroso ensaísta.
