O concelleiro de Vías e Obras, Xesús Domínguez, visitou esta mañá a rúa das Rodas na que o Concello vai executar unha intervención para mellorar a accesibilidade peonil á Galiña Azul de San Roque. Con esta actuación, consistente na construción dun paso elevado de peóns, o Concello incrementará a seguridade do tránsito escolar na zona, respondendo ás demandas de proxenitores e da ANPA.
Xesús Domínguez detallou que este proxecto, que acaba de ser aprobado pola Xunta de Goberno co obxectivo de mellorar a accesibilidade peonil á Galiña Azul de San Roque, “responde á escoita activa dos sectores implicados, os pais e nais, e da ANPA desta escola infantil que hai anos viñan demandando un paso seguro”, xa que na actualidade o tránsito escolar ten que facerse a través do paso de peóns da Porta do Camiño ou ao de San Roque, “xenerando situacións de inseguridade”.
O concelleiro explicou que esta actuación consistirá na construción dun “paso de peóns elevado con plataforma única onde se vai recuperar a cota das beirarrúas, creando unha zona de preferencia peonil”, así como na mellora das instalacións da rede de pluviais, cun soterramento da nova recollida de augas baixo o novo paso, e na renovación do mobiliario urbano na entrada da escola.
Segundo o edil, esta actuación permitirá “aumentar a seguridade, dar preferencia aos peóns, facendo que os vehículos teñan que ir cunha velocidade máis pausada” pola rúa das rodas.
Esta actuación, que contará con 66.209,99 euros de orzamento e un prazo de execución de tres meses, “é totalmente coherente e compatible coa filosofía do conector central e vaise executar de forma coordinada entre todos os departamentos”, detallou.
Ademais, como indicou Xesús Domínguez, esta intervención súmase a outras deste tipo “como a que se vai levar a cabo na rúa dos Loureiros, na que tamén se fará un paso de peóns elevado que vai facilitar e garantir a seguridade do paso escolar entre as escaleira de San Roque e a ruela da Estila”.
