Estarán dirixidas pola comisaria e filla do artista, Ana Iglesias, e incluirán unha visita ao Salón de Sesións
O Concello organiza durante estes meses de febreiro e marzo visitas guiadas á exposición ‘O legado de José Ramón’, que se atopa aberta ao público na Sala de Exposicións do Palacio Municipal de María Pita ata o vindeiro 30 de marzo. “Desde o Goberno de Inés Rey queremos dar a coñecer a figura dun dos artistas coruñeses máis recoñecidos, que nos deixou un legado de suma importancia que inclúe obras como o escudo da cidade”, indicou Gonzalo Castro, concelleiro de Cultura e Turismo.
Os vindeiros días 19 de febreiro, e 5, 19 e 26 de marzo de 18 a 19:00h realizaranse visitas guiadas por Ana Iglesias, comisaria da exposición e filla do artista. Cada grupo ten unha capacidade limitada a 25 persoas. A reserva de prazas pódese facer escribindo ao correo: kioscoalfonso@coruna.gal.
Ana Iglesias será a encargada de realizar as visitas guiadas nas que proporcionará información detallada sobre os diversos aspectos das obras expostas: o proceso creativo, o seu estilo, as técnicas utilizadas, o contexto histórico. A visita será aínda máis enriquecedora na primeira planta do Palacio Municipal, onde os e as visitantes poderán ver con detalle as tallas do Salón de Sesións, o Libro de Ouro e os escudos da cidade.
A exposición ‘O legado de José Ramón’ xorde a partir dunha xenerosa doazón realizada pola familia do ilustre artista ao Concello, coa que se cumple co desexo expreso do propio José Ramón. A mostra inclúe 24 debuxos orixinais que narran episodios clave da historia da Coruña. Estas obras serviron como base para que o ebanista Ladislao Stern realizase as icónicas tallas en madeira que decoran o Salón de Sesións do Concello. Así mesmo, a exposición enriquécese cos debuxos orixinais do Libro de Ouro, nos que destacan os seus escudos heráldicos, e con representacións de momentos históricos emblemáticos, como a defensa de María Pita contra as tropas inglesas. Para completar este percorrido artístico e histórico, preséntase unha selección de obras pertencentes á última etapa creativa do artista que ofrecen unha visión integral da súa traxectoria.
