O Concello de San Sadurniño vai poñer en marcha a principios de febreiro o novo Punto Limpo móbil, que percorrerá as parroquias de maneira rotatoria durante nove meses ao ano co obxectivo de facilitarlle á veciñanza a correcta xestión de residuos que non poden depositarse nos colectores convencionais. Trátase dun remolque compartimentado para a recollida selectiva de materiais como lámpadas, pilas, pequenos electrodomésticos, tóners, plásticos que non sexan envases ou entullos procedentes de pequenas reparacións domésticas (menos uralitas e restos de grandes demolicións). O novo servizo complementará a recollida domiciliaria de voluminosos, que poderá seguir solicitándose no 981 490 027.
A primeira parada do remolque está programada na Praza Ramón Díaz Raña, en San Sadurniño, onde permanecerá durante a primeira quincena de febreiro, do día 2 ao 16.
A continuación, o Punto Limpo móbil trasladarase ao local social de Santa Mariña do 17 ao 23 de febreiro; logo irá para o Camiño Arriba, onde permanecerá do 24 de febreiro ao 2 de marzo e pechará esta primeira rolda en Bardaos entre o 3 e o 9 de marzo.
Despois, o remolque regresará de novo a San Sadurniño e, tras quince días na Praza Ramón Díaz Raña, reiniciará outra vez o ciclo con estadías semanais -por esta orde- en Lamas (do 25 ao 31 de marzo), Ferreira de Abaixo (1 a 7 de abril), Ferreira de Arriba (8 a 14 de abril), Igrexafeita (15 a 21 de abril) e Naraío (no Piñeiro, do 22 ao 28 de abril).
Os percorridos rotatorios suspenderanse en xullo, agosto e setembro, deixando o Punto Limpo móbil en San Sadurniño. Iso si, o remolque estará á disposición do tecido social para que poidan utilizalo en festas e outros eventos como illa de recollida selectiva para papel, envases ou vidro, xa que os compartimentos posúen paneis indicadores intercambiables para distintos tipos de restos.
Este novo equipamento, financiado pola Consellaría de Medio Ambiente e Cambio Climático, vén complementar a recollida domiciliaria de residuos voluminosos —que pode solicitarse chamando ao 981 490 027— ou a posibilidade de utilizar de balde o Punto Limpo do Río do Pozo, grazas a un convenio subscrito hai varios anos co Concello de Narón.
Co novo Punto Limpo móbil, o Concello de San Sadurniño busca facilitar a reciclaxe, reducir a aparición de vertedoiros incontrolados, diminuír a presenza de residuos impropios nos colectores e seguir avanzando cara a un modelo de xestión do lixo máis sostible, tanto desde o punto de vista ambiental como económico.
