· Máis de 400 encaixeiras, chegadas de Galicia e doutros puntos de España, participaron nunha xornada que xirou ao redor do encaixe pero na que tamén houbo un mercado de Nadal e outros postos.
· “Hoxe celebramos a nosa identidade, a nosa tradición e o traballo e o talento das mulleres que fan posible que a arte do encaixe continúa viva e máis fermosa ca nunca”, salientou Sandra Insua.
A Festa da Palilleira de Camariñas chegou á décima edición por todo o alto, con máis de 400 palilleiras chegadas desde diferentes puntos de Galicia e doutras partes de España para desfrutar dun evento que fixo que o son dos palillos amenizase este día festivo.
Foron aínda moitas máis as persoas que se achegaron durante toda a xornada ao pavillón para ver de primeira man a arte do palillo e do encaixe de Camariñas e, ademais, botar unha ollada ao Mercado de Nadal con comercios especializados en encaixe e tamén outras tendas locais e dos arredores.
Ademais, co obxectivo de implicar nesta festa a todos os veciños e veciñas de Camariñas, instaláronse inchables durante toda a xornada e, pola tarde, realizouse o sorteo d chales de encaixe doados polas asociacións Rendas e Puntillas e ofreceuse chocolate con churros.
Na apertura da xornada participaron a alcaldesa de Camariñas, Sandra Insua, o director da Axencia Galega de Turismo, Xosé Manuel Merelles; a presidenta da Asociación Rendas, Dorita García Carril; e a da Asociación Puntillas, Pilar Gándara Méndez.
Sandra Insua deulle a benvida a todas as asociacións participantes e salientou que “hoxe é un día moi especial, un día no que celebramos a nosa identidade, a nosa tradición e, sobre todo, o traballo e o talento das mulleres que fan posible que a arte do encaixe continúa viva e máis fermosa ca nunca”. “O encaixe é moito máis que un oficio ou unha tradición artesanal. É unha forma de expresión cultural que nos conecta coas nosas raíces e nos proxecta cara ao futuro. Cada peza de encaixe é única, como único é o legado que queremos preservar e transmitir ás novas xeracións”, expresou.
Ademais, a rexedora lembrou que “a Festa da Palilleira volve a ser a antesala da Mostra, o evento de referencia para todas e todos nós. Hoxe comezan a repenicar os palillos con ese son inconfundible que xa permanecerá neste pavillón ata Semana Santa”.
