Os 52 veleiros retomaron a peregrinación rumbo á illa de Ons, antes de enfilar proa cara a Portonovo
Os 52 veleiros e as máis de 200 persoas que toman parte no V Roteiro Rías Baixas-Camiño de Santiago pola Ría de Muros Noia viaxan hoxe martes camiño de Portonovo, onde espérase a súa chegada ao Club Náutico a iso das 20:00 horas. Do mesmo xeito que na xornada de onte luns, o tempo está a acompañar aos peregrinos pois non só non hai físgoa algún da onda de calor senón que hai unha lixeira brisa que axuda á navegación e fai que a temperatura sexa excelente para o desenvolvemento da xornada.
Unha xornada na que a Ría de Aldán foi a gran protagonista, ao ser “tomada” polas embarcacións do roteiro, que fondearon nela para pasar a noite de onte luns e desde onde saíron a media mañá de hoxe martes camiño á illa de Ons, espazo natural protexido onde gozar da natureza, antes de enfilar a proa cara a Portonovo. Esta localidade costeira, con tradición pesqueira e alma festiva, recibirá aos peregrinos cunha celebración gastronómica protagonizada polo marisco e os produtos da contorna, unha homenaxe á riqueza culinaria galega e un momento de confraternización entre os participantes (aínda que algúns navegantes xa tiveron ocasión de entrar en contacto con esta gastronomía ao longo da xornada de onte, coincidindo coa escala de 4 horas que fixeron fronte ás Illas Cíes).
Para mañá mércores 2 de xullo está previsto que a frota parta a media mañá do Club Náutico de Portonovo cara á ría de Arousa, o maior dos estuarios galegos e un dos máis produtivos do mundo en mariscos e pesca artesanal. A frota navegará entre bateas e paisaxes mariños de gran beleza ata alcanzar A Pobra do Caramiñal, onde a xornada finalizará cunha cea mariñeira ao aire libre.
Uns clubs náuticos nos que os máis de 200 participantes no V Roteiro Rías Baixas-Camiño de Santiago pola Ría de Muros Noia están a selar as súas credenciais xacobeas, pois ten un dobre premio: todos aqueles que completen o sábado o percorrido a pé desde Bertamiráns (Ames) ata a catedral de Santiago poderán recibir a Compostela; pero ademais o peregrino náutico que consiga máis selos para a súa credencial recibirá un “cofre pirata” repleto de produtos da Ría de Muros Noia: conservas, galletas, licores… Uns selos que poden conseguir tanto nos clubs náuticos como noutros establecementos do percorrido.
Un itinerario con alma:
Un total de 52 embarcacións participarán nesta edición 2025, que se celebra do 30 de xuño ao 5 de xullo e que permite aos tripulantes vivir a experiencia do Camiño de Santiago pola Ría de Muros Noia, recuperando unha tradición que se remonta á Idade Media, cando peregrinos de toda Europa chegaban por vía marítima a Galicia. O roteiro segue o itinerario dunha desas peregrinacións, a do navegante veneciano Pietro Querini (1431).
Unha peregrinación especial pois establece 3 feitos constituíntes do Camiño da Ría de Muros Noia: o punto de inicio (o porto de Muros), a distancia (73 km) e o trazado. Ademais, forma parte do itinerario galego da Vía Querinissima, que está á espera do seu recoñecemento como itinerario cultural europeo. De feito, a Asociación Vía Querinissima conta cunha caseta no V Roteiro Rías Baixas-Camiño de Santiago da Ría de Muros Noia, no que dá a coñecer a actividade desta entidade cultural sen ánimo de lucro nacida fai máis dunha década por mor dun primeiro acordo de amizade entre os municipios de Rost (Noruega) e Sandrigo (Italia) e despois dun convenio de cooperación cultural e económica entre as rexións de Nordland e Véneto. Esta asociación promove un turismo cultural e enogastronómico pausado e sostible, que une cidades e rexións de trece países distintos.
