Realizarase un roteiro de sendeirismo polas marismas de San Adrián, un roteiro cultural polo centro histórico e unha visita teatralizada polos lugares máis emblemáticos da vila.
Todas as actividades son gratuítas e requiren inscrición previa.
O Concello de Ortigueira, a través da súa Concellería de Turismo e Patrimonio, organizou unha serie de actividades gratuítas con motivo da Semana Santa, destinadas a residentes e visitantes que desexen coñecer mellor a contorna natural e histórica da zona. As actividades desenvolveranse entre os días 17 e 19 de abril, ofrecendo roteiros de sendeirismo, percorridos culturais e unha visita teatralizada.
O xoves 17 de abril, os participantes poderán gozar dun roteiro de sendeirismo polas marismas de San Adrián. A saída está prevista ás 8:43 horas desde Ortigueira no tren FEVE, con regreso ás 15:53 horas desde Ponche Mera. Este percorrido de 10 quilómetros de baixa dificultade permitirá aos asistentes explorar un ecosistema único e descubrir a riqueza natural da contorna.
O venres 18 de abril, levará a cabo un roteiro cultural polo centro histórico de Ortigueira. A saída terá lugar ás 11:00 horas desde o Gaiteiro dos xardíns e concluirá ás 13:00 horas no mesmo punto. Este percorrido de dous quilómetros, tamén de baixa dificultade, ofrecerá aos participantes unha inmersión no patrimonio arquitectónico e cultural do municipio.
Para pechar o programa de actividades, o sábado 19 de abril celebrarase unha visita teatralizada guiada polo historiador e actor Suso Martínez. Este percorrido literario e máxico pola historia de Ortigueira comezará ás 12:00 horas e terá unha duración aproximada dunha hora e media.
Todas as actividades son gratuítas, pero requiren inscrición previa na oficina de turismo ou a través do teléfono 981 422 089. O Concello de Ortigueira convida a toda a cidadanía e aos visitantes para sumarse a estas propostas para gozar da Semana Santa dunha maneira diferente, combinando natureza, historia e cultura.
