- Participan na iniciativa xa conservatorios profesionais de música da Coruña, Santiago e Vigo, o superior de Vigo e a Escola de Arte Superior de Deseño Pablo Picasso
- Ademais impartiranse en modalidade plurilingüe o vindeiro curso catro ciclos nas escolas de Arte e superiores de Deseño da Coruña e Lugo
A Xunta de Galicia vén de incorporar os conservatorios profesionais de música Xan Viaño (Ferrol) e Manuel Quiroga (Pontevedra) ao programa de seccións bilingües en ensinanzas artísticas. O Diario Oficial de Galicia publica hoxe a resolución pola que se autoriza o funcionamento destas seccións durante dous anos.
No caso do conservatorio ferrolá o idioma empregado será o inglés, mentres que o centro pontevedrés opta pola lingua portuguesa. En ambos casos a finalidade é promover a práctica destes idiomas entre o alumnado.
Estas novas seccións súmanse ás que veñen funcionando (e acaban de ser prorrogadas por dous anos máis) en lingua inglesa nos conservatorios profesionais de música da Coruña, Santiago de Compostela e Vigo e no Conservatorio Superior de Música de Vigo. Así mesmo, a Escola de Arte Superior de Deseño Pablo Picasso (A Coruña) conta cunha sección bilingüe de lingua alemá.
PluriArt
A maiores, as escolas de Arte e superiores de Deseño Pablo Picasso (A Coruña) e a Ramón Falcón (Lugo) impartirán catro ciclos plurilingües o vindeiro curso no marco do programa PluriArt. En concreto impartiranse en modalidade plurilingüe en lingua inglesa os ciclos formativos de grao superior en Dourado, Prateado e Policromía e o de Ilustración, ambos da escola Pablo Picasso da Coruña. No caso da Escola de Arte e Superior de Deseño Ramón Falcón de Lugo, serán plurilingües o ciclo de grao medio en Serigrafía artística e o de grao superior en Fotografía.
Estas accións enmárcase na Estratexia Galega de Linguas Estranxeiras, Edulingüe 2030 e, máis en particular, no impulso ao plurilingüismo nas ensinanzas artísticas.
