· A peza audiovisual do primeiro clasificado, Brais Ponche Paz, pasará ao certame nacional “Rodando pola Igualdade”, cuxo fallo se dará a coñecer o 25 de marzo.
O Concello de Cambre deu onte a coñecer aos dous gañadores do seu concurso de vídeos a través da plataforma TikTok. O primeiro premio, dotado con 200 euros, foi para Brais Ponche Paz, mentres que o segundo –de 100 euros- recaeu en mans de Leticia Couto Maroño.
Ao alcanzar o primeiro posto no certame, o vídeo de Brais pasará directamente ao concurso nacional de “Rodando pola Igualdade”. A través da frase “limpa a mirada”, o autor convídanos a deixar ao carón os prexuízos e os estereotipos de xénero a favor da igualdade.
Na mesma liña, o vídeo da segunda clasificada trata os roles e estereotipos de xénero relacionándoos, nesta ocasión, cos coches e a condución.
Ao redor do hashtag # Cambreporlaigualdad, os vídeos participantes no concurso acumularon máis de 8.000 visitas ao longo das últimas semanas. Con esta convocatoria, o Concello buscaba estimular a capacidade creativa da cidadanía e potenciar a reflexión e a concienciación pola igualdade de xénero.
O certame enmarcouse dentro da iniciativa nacional “Rodando pola igualdade”, á que se sumaron máis de 50 municipios ou rexións de toda a xeografía española para loitar xuntas pola igualdade de xénero. Deste xeito, a obra que conseguiu o primeiro premio competirá co resto de obras gañadoras dos seus respectivos certames locais para dilucidar cales son os mellores traballos a nivel nacional, que recibirán tres galardoes: un 1º premio dotado con 1.000 euros e 500 euros en formación en liña ou presencial na escola audiovisual EFTI de Madrid, un 2º premio dotado con 500 euros e un 3º premio dotado con 250 euros. O fallo dos premios a nivel nacional farase público o 25 de marzo.