O polideportivo municipal de Boqueixón acolleu este mediodía un acto conmemorativo do Día Internacional pola Eliminación da Violencia de Xénero no que participaron uns 250 nenos e nenas do CPI Antonio Orza Couto, dende infantil ata a ESO. Un acto ao que asistiron o alcalde de Boqueixón, Ovidio Rodeiro, xunto con Cristina Carbajales e Yolanda Neira, directora e psicóloga do Centro de Información á Muller.
Unha actividade que substituía á andaina prevista inicialmente e que foi suspendida debido á climatoloxía adversa. No seu lugar, o alumnado presentou un resumo do traballado nas clases ao longo destes días e que se concretaba en tres grandes ás cuxas plumas eran mensaxes escritos por cada rapaza e rapaz con mensaxes contra a violencia de xénero. A maiores, cada curso achegou as súas propias ás, decoradas ao seu gusto.
Pola súa banda, o profesorado portaba unhas camisetas coa lenda: “Esta camiseta non vai contigo… se ante as violencias machistas miras para outro lado. Se non queres ser cómplice, mellor implícate”. Unhas camisolas que tamén se puxeron tanto o alcalde como as integrantes do CIM de Boqueixón.
A xornada rematou cun minuto de silencio, tanto no pavillón municipal do Forte como diante da casa do concello, onde se concentraron persoal municipal e concelleiros/as de Boqueixón.
