Difundirá un vídeo das Súas Maxestades a través das Redes Sociais
O Concello de Padrón lamenta informar de que este ano non organizará a tradicional cabalgata de Reis, como medida de prevención diante do aumento de casos de Covid-19 nas últimas semanas e que teñen ao municipio en situación de vixilancia especial por parte do comité clínico da Consellería de Sanidade.
A concelleira de Cultura, Lorena Couso, explica que “tiñamos preparado facer unha cabalgata polas parroquias para así evitar aglomeracións pero diante do aumento de casos e seguindo os consellos das autoridades sanitarias finalmente tomamos a decisión de non facela este ano para evitar riscos e previr a extensión do virus”. O Concello de Padrón divulgará mañá martes a través das súas redes sociais un vídeo das Súas Maxestades dirixido aos nenos e nenas do municipio.
O que si se mantén é o tradicional Concerto de Reis, organizado pola Banda Municipal de Padrón e o Concello de Padrón, que terá lugar o mércores 6 de xaneiro, ás 19:00 horas, no auditorio municipal. O programa inclúe un total de dez pezas clásicas interpretadas polo grupo de saxofóns, pola sección de vento madeira e percusión e pola sección vento metal e percusión que van dende a gran marcha de Aída ata a panxoliña “All I want for Christmas is you” de María Carey, pasando pola Muiñeira de Cuncheiro. O aforo é limitado e as entradas poden recollerse no Centro Social de Padrón, en horario de 9:00 a 14:00 horas.
