O ciclo de obradoiros conforma a Campaña de Sensibilización Ambiental do municipio neste 2025
As inscricións poden concretarse a través do mail correo@concellodepaderne.com ou chamando á Casa Consistorial
Poda de kiwis, poda de árbores froiteiras, obradoiro de enxertos e construción de trampas para a captura da vespa velutina. Son os catro cursos gratuítos que conforman a Campaña de Sensibilización Ambiental do Concello de Paderne neste 2025 e que se celebrarán na Casa Consistorial ao longo de seis sesións entre febreiro e abril.
O goberno local aposta por reeditar unhas formacións que o pasado ano xeraron moito interese entre a súa veciñanza e volverá a ofertar de xeito gratuíto. Faino como parte do seu plan para ofrecer á poboación ferramentas teórico-prácticas para o coidado da contorna natural.
A primeira formación no calendario será o Obradoiro de Poda de Kiwis. Está previsto para o sábado 15 de febreiro ás 10:30 horas. Case un mes despois, o mércores 12 de marzo, o Concello abrirá as súas portas ás 19:00 horas para acoller o Obradoiro de Enxertos vexetais. Tres días despois, o sábado 15 de marzo, será o Obradoiro de Poda de Árbores Froiteiras o que se celebre na Casa Consistorial a partir das 10:30 horas.
Por último, o Obradoiro de Construción de Trampas para Captura de Vespa Velutina. Esta será unha formación máis longa, de tres sesións. A primeira será o mércores 5 de marzo. A segunda, o día 26. A terceira, o 9 de abril. Celebraranse todas a partir das 20:00 horas e nelas agasallarase aos asistentes con produto ‘atraínte’ para as vespas co obxectivo de que os alumnos e alumnas desenvolvan as ensinanzas adquiridas entre sesións.
As inscricións poden concretarse desde xa chamando ao teléfono do Concello (981797001) ou escribindo un mail a correo@concellodepaderne.com.
