· Os asistentes de maior idade foron Juana Rilo Rey e Darío Fernández.
O polideportivo da Senra acolleu hoxe a XXI edición do Encontro dos Maiores do Concello de Bergondo, evento que reúne cada ano por centos de veciños de todas as parroquias do municipio que teñan 60 anos ou máis e ao que nesta edición asistiron ao redor de 400 persoas.
A tradicional misa, que comezou ás 14 horas e contou nesta ocasión coas voces da Coral Polifónica Costumes de Bergondo, foi o punto de partida do evento. Ao acto relixioso seguiulle a comida, na que os asistentes compartiron mantel e charla nun ambiente festivo, e pola tarde unha actuación musical disposta polo Concello amenizou a xornada.
A festa estivo presidida pola alcaldesa, Alejandra Pérez, acompañada de diferentes membros da corporación. Houbo tamén tempo para as homenaxes aos máis lonxevos. A muller de maior idade asistente foi Juana Rilo Rey, de Pisón, que cumpriu en abril 94 anos. Doutra banda, a homenaxe ao home de máis idade asistente recaeu este ano en Darío Fernández, de Lubre, que en maio cumpriu os 96 anos. Tamén estivo presente Francisca Lambas Mallo, veciña de Cortiñán de 99 anos, que noutras edicións xa fora a homenaxeada e preferiu poder gozar da festa co resto de asistentes.
