• A exposición reúne creadoras noveis e consagradas vinculadas ao municipio, nunha mostra colectiva que abrangue múltiples disciplinas artísticas
O Concello de Ribeira inaugurará este xoves, 5 de marzo, ás 20:30 horas, a terceira edición de EMPODERARTE. Mostra de Mulleres Creadoras de Ribeira 2026, unha iniciativa cultural consolidada que pon en valor o talento feminino vinculado ao municipio.
Nesta edición participan 46 artistas, tanto noveis como consagradas, procedentes de Ribeira, da súa contorna e doutros puntos de Galicia, pero todas elas cunha vinculación estreita coa localidade. A mostra caracterízase polo seu carácter colectivo e pola variedade de disciplinas representadas, que inclúen pintura, debuxo, gravado, artesanía, fotografía, escultura e outras expresións artísticas contemporáneas.
O acto inaugural contará coa actuación do grupo de cantareiras “As Sete Linguas”, da Asociación Francisco Lorenzo Mariño de Aguiño. No transcurso da inauguración intervirán a alcaldesa de Ribeira, María Sampedro Fernández; a concelleira de Cultura, Ana Barreiro; e o xestor cultural municipal, Unai González, comisario da mostra xunto a Sara García. EMPODERARTE consolídase así como un espazo de visibilidade, encontro e recoñecemento do papel das mulleres creadoras no ámbito cultural, reforzando o compromiso do Concello de Ribeira coa igualdade, coa promoción da cultura de base e coa dinamización artística do municipio.
Dende o goberno municipal anímase á veciñanza a asistir ao acto inaugural e a visitar a mostra, que representa unha ampla panorámica do talento creativo feminino vencellado a Ribeira.
