HomeA CoruñaUns 160 escolares de Ribeira visitan o patrulleiro Tabarca durante a súa...

Uns 160 escolares de Ribeira visitan o patrulleiro Tabarca durante a súa escala no porto

- Anuncio -spot_img

 Representantes municipais tamén fixeron unha visita institucional ao navío

O patrulleiro Tabarca (P-28), da Armada, fai escala no porto de Ribeira dende a mañá deste venres 28 ata a tarde do sábado 29. Durante esta xornada, uns 160 escolares de Ribeira achegáronse para coñecer o buque da man da súa tripulación durante a patrulla de vixilancia e seguridade que se está facendo en augas do litoral galego nestes últimos días do mes de novembro. Alumnado dos colexios de Frións, Artes e Sagrado Corazón de Jesús estiveron no día de hoxe.

Ata alí tamén se achegaron o primeiro tenente de alcalde, Vicente Mariño; a concelleira de Educación, Nucha Brión; e o edil de Mar, Fernando Abraldes, para coñecer o navío e o labor que realiza guiados polo comandante José Enrique Delgado Gómez.

Dita estadía enmárcase na serie de paradas que realiza o navío polos portos para posibilitar á cidadanía facer un percorrido polo mesmo e coñecer o equipamento e capacidades, ademais da súa dotación e forma de vida a bordo.

O patrulleiro pode continuar visitándose durante a tarde deste venres 28, de 16.00 a 18.00 horas, e no sábado 29, de 10.00 a 13.00 horas.

Vixilancia e seguridade marítima

A súa misión é a de efectuar vixilancia marítima con presencia naval e control dos espazos marítimos de interese nacional, ademais de velar polo patrimonio subacuático e colaborar no adestramento dos alumnos da Escola Naval Militar, en Marín, onde ten a súa base.

O Tabarca é o oitavo buque dunha serie de dez unidades da Clase Anaga, dos cales permanecen en servicio tres. Cada un leva o nome dunha illa da costa española e este toma a súa nomenclatura dunha pequena illa de Santa Pola.

Este patrulleiro botouse no 23 de decembro de 1980 e entregouse á Armada no 31 de decembro de 1981; adscrito ao Mando de las Unidades de la Fuerza de Acción Marítima de Ferrol (Marfer).

Publicacións Relacionadas