A axencia, pioneira en Narón, conmemora o seu aniversario cun evento especial ao que convida á súa clientela
Benito Castro e María José Vázquez destacan a adaptación tecnolóxica e a atención personalizada como claves do seu éxito
Viaxes Narón, a primeira axencia de viaxes que se instalou no concello de Narón, celebra este ano o 25º aniversario da súa fundación, en xullo de 1999. A aventura comezou nun local do recentemente estreado Centro Comercial de Narón, tras case un ano de maduración do proxecto. O seu obxectivo era claro: cubrir as necesidades dos habitantes dun Narón en crecemento e a súa área de influencia.
Desde os seus inicios, Viaxes Narón destacou pola súa atención directa e próxima, adaptándose ás necesidades de cada cliente. Ao longo destes anos, a súa oferta foi evolucionando ata especializarse nas viaxes en grupo de tamaño reducido, e deseñados a medida para cada destino. Ademais, estes grupos sempre viaxan acompañados por persoal da axencia desde Narón, o que asegura unha experiencia personalizada e coidada ao mínimo detalle. A finais de agosto, un destas viaxes en grupo levounos a percorrer Croacia, e xa de volta desta aventura, a mirada está posta no próximo destino, Exipto, ao que viaxarán en novembro.
Viaxes Narón tamén forxou nestes 25 anos unha constante actualización tecnolóxica, que lles permite mellorar o seu servizo e manterse ao día coas tendencias cambiantes do sector turístico.
Benito Castro e María José Vázquez, á fronte do negocio, subliñan que “o equilibro entre a atención personalizada, a innovación tecnolóxica, a formación e a nosa paixón polas viaxes é o que nos permite mellorar o servizo e manternos ao día coas tendencias do sector turístico”.
Para conmemorar o seu 25º aniversario, Viaxes Narón está a preparar un evento moi especial, o vindeiro venres 27 en Pazo Libunca, co que desexan agradecer a fidelidade da súa clientela. “Queremos que nosa gran familia siga crecendo e acompáñenos para celebrar outros 25 anos de éxito”, conclúen os propietarios.
