Será o vindeiro venres, 3 de maio, a partir das 22:30 horas, no Alto de San Bartolo, en Salto
A xornada estará guiada por Begoña Brao e Antón Pérez, monitores do primeiro destino starlight de Galicia, as Illas Cíes
O Concello de Vimianzo fará o vindeiro venres, 3 de maio, un paseo polas estrelas. Trátase dunha actividade de observación astronómica que pretende dar a coñecer e achegar a observación astronómica á cidadanía local e visitantes.
Terá lugar a partir das 22:30 horas no Alto de San Bartolo, en Salto, día para o que se agardan unhas condicións de visibilidade “óptimas”, tanto pola posición da lúa como pola meteoroloxía prevista para esta data. A localización é o lugar ideal para contemplar as estrelas e forma parte da Rede de Miradores Estelares do Destino Starlight Costa da Morte.
A actividade estará guiada por Begoña E. Brao e Antón P. Pérez, monitores do primeiro destino Starlight de Galicia, as Illas Cíes. Ámbolos dous realizaron, ademais, un curso de formación na Costa da Morte, polo que coñecen á perfección a zona e as súas características. Estarán acompañados pola técnica de Turismo, Mariví Amigo, e a de Cultura, Nieves Lema, que posúen o certificado de monitoras starlight.
As persoas interesadas en participar deberán inscribirse previamente a través da ligazón habilitada: https://docs.google.com/forms/d/e/1FAIpQLSeXpFK2-iz19kyq8b2WQbvnjegVf_qeTn9QfWmut4ogwRZ0VQ/viewform
Trátase da primeira das múltiples actividades realizadas co obxectivo de fomentar o astroturismo no municipio.
Segundo indicou a alcaldesa de Vimianzo, Mónica Rodríguez, “en Vimianzo gozamos dunha contorna privilexiada para a observación astronómica, polo que tratamos de impulsar estas actividades para achegar este tipo de actividades á poboación e xerar interese na materia”.
A rexedora quixo convidar “a todos e todas, veciñanza e visitantes a participar nesta xornada que, previsiblemente, gozará das condicións perfectas para observar o ceo e as estrelas en plenitude”.
