Esta alianza foi asinada en Fitur por parte do presidente do Inorde e deputado de Representación Institucional, Rosendo Fernández; e polo director da Área de Negocio de Alta Velocidade e Outros Servizos Comerciais de Renfe, Javier Pérez López
Este acordo, suscrito a través do Inorde, inclúe descontos do 10% en billetes AVE e Longa Distancia
A Deputación de Ourense, a través do Instituto Ourensano de Desenvolvemento Económico (Inorde) e Renfe, veñen de subscribir un acordo de colaboración para fomentar de forma conxunta o turismo na provincia de Ourense e os desprazamentos en tren como medio de transporte seguro e sostible. Esta alianza foi asinada en Fitur por parte do presidente do Inorde e deputado de Representación Institucional, Rosendo Fernández; e polo director da Área de Negocio de Alta Velocidade e Outros Servizos Comerciais de Renfe, Javier Pérez López.
Con este acordo, ambas entidades colaboran na promoción de Ourense como destino turístico e de negocios. A compañía Renfe ofrecerá un 10% de desconto sobre a tarifa no momento da compra aos asistentes e expositores das actividades que se leven a cabo para promocionar o turismo de congresos, convencións e aqueles outros eventos que celebre ou organice a Deputación a través do Inorde. Renfe tamén ofrecerá o mesmo desconto sobre o prezo de referencia a todo viaxeiro que contrate escapadas temáticas ou de turismo MICE (Meetings, Incentivos, Convencións, Eventos e Congresos) a través das empresas designadas polo Consorcio.
Por último, este acordo tamén facilitará a realización de viaxes en grupo en tren, así como a posibilidade de promover paquetes vacacionais que inclúan os trens de Longa Distancia de Renfe e outros servizos de aloxamento, ocio e cultura.
