Con este programa, que estará en vigor entre o 15 de maio e o 15 de xullo, a institución provincial pretende axudar ás persoas emprendedoras no deseño e na posta en marcha de proxectos empresariais
As persoas emprendedoras da provincia interesadas en participar poderán presentar a súa solicitude ata o 12 de maio a través da páxina web de SmartPeme+
A Deputación de Pontevedra acaba de abrir o prazo para participar no III Programa de Emprendemento que se desenvolverá no Viveiro de Empresas de Lalín, situado no Polígono Industrial Lalín 2000. Con este programa, que estará en vigor entre o 15 de maio e o 15 de xullo, a institución provincial pretende axudar ás persoas emprendedoras no deseño e na posta en marcha de proxectos empresariais que se atopan en fase inicial. O prazo de solicitude estará operativo ata o 12 de maio e as persoas emprendedoras poderán realizar o trámite a través da páxina web de SmartPeme+.
O Programa de Crecemento Empresarial no Viveiro de Lalín de SmartPeme está destinado a aquelas persoas que acaban de iniciar a actividade do seu proxecto. Deben ter o domicilio social e principal na provincia de Pontevedra ou, no caso de non estar constituído o proxecto, que a persoa responsable sexa residente neste territorio. As persoas interesadas deberán cubrir o formulario na web de SmartPEme+ e achegar unha memoria, cunha extensión máxima de 5 páxinas, na que se especificarán os obxectivos do proxecto; as metas que se buscan alcanzar coa participación no III Programa de Emprendemento da Deputación; a misión, visión e valores da empresa; a actividade a realizar; e a descrición do produto ou servizo ofrecido. Tamén se deberá achegar un documento co perfil dos participantes. A documentación será avaliada por un equipo técnico de SmartPeme+.
Os proxectos seleccionados pola Deputación beneficiaranse dun completo programa formativo no Viveiro de Lalín que se estenderá entre o 15 de maio e o 15 de xullo. Durante este período, as persoas emprendedoras recibirán asesoramentos individuais e personalizados adaptados ás necesidades específicas de cada participante. Tamén se achegará formación sobre o plan de empresa e de marketing e a análise do comportamento dos consumidores, así como sobre axudas para impulsar proxectos emprendedores, identidade corporativa ou produto mínimo viable. Tamén terán lugar encontros con empresas, no que se darán a coñecer casos de éxito de edicións anteriores do Programa de Emprendemento da Deputación, outdoor training e actividades de Lego Serios Play, para construír escenarios de futuro. E ao remate do programa terá lugar unha xornada de presentación dos proxectos onde un comité de avaliación fará entrega do premio á mellor iniciativa de emprendemento de entre os proxectos participantes.
