As achegas, que superan en 30.000 euros o crédito que se lles destinaba en 2023, permitirán ás entidades financiar, entre outros asuntos, gastos de persoal, de material ou reparación e conservación dos seus locais
A Deputación de Pontevedra acaba de dar luz verde a unha nova liña de axudas para apoiar as escolas de música xestionadas por asociacións sen ánimo de lucro da provincia. A liña está dotada de 120.000 euros, o que supón, como salientou o presidente provincial, Luis López, “un aumento de 20.000 euros respecto ao ano pasado e de 30.000 euros respecto ao que recibían en 2023”. O presidente da Deputación salientou que, “ao igual que o municipalismo que abandeira este goberno, tamén estamos moi preocupados de recuperación a estreita relación que consideramos que a Deputación debe ter co asociacionismo da provincia”, e enmarcou este aumento das axudas na necesidade de “que conten con máis crédito para atender as súas demandas”.
As axudas permitirán ás escolas de música dependentes de asociacións sen ánimo de lucro financiar gastos de persoal e de material de oficina, subministracións, a reparación e conservación dos seus locais, a reparación de instrumentos, as primas de seguros, servizos de asesoría ou xestoría e tamén gastos de prevención de riscos ou recoñecemento médico. As subvencións outorgaranse en réxime de concorrencia competitiva e teranse en conta criterios como o número de alumnos, o número de docentes, o orzamento de gastos da escola ou as especialidades impartidas.
Segundo o presidente provincial, estas axudas permitirán apoiar “a uns verdadeiros dinamizadores culturais da nosa provincia”, e puxo en valor “o labor fundamental que teñen estas asociacións para que as escolas de música se manteñan con vida máis alá das grandes cidades”.
