O proxecto OU-intelixente prevé a colocación de máis de 65.000 contadores en 81 concellos, dotando ás entidades locais de ferramentas tecnolóxicas para mellorar a eficiencia dos seus servizos hidráulicos
O equipo actual de traballo reforzarase no mes de xaneiro co obxectivo de rematar no primeiro trimestre do ano os labores no oriente ourensán e inicialos no resto de comarcas adheridas
A Deputación de Ourense avanza no proxecto “OU-intelixente” para aumentar a eficiencia dos servizos hidráulicos na provincia coa dixitalización dos mesmos. Deste xeito, o programa liderado pola Deputación, a través da empresa mixta AquaOurense (formada pola propia institución provincial e Viaqua), ten en marcha a instalación de máis de 65.000 contadores intelixentes na provincia. O equipo actual, que se reforzará en xaneiro, rematará o ano coa instalación de 2.000 contadores intelixentes en Valdeorras, coa previsión de chegar aos 4.000 ao mes coa ampliación dos traballos.
Deste xeito, a principios do 2025 prevese que estean operativos novos equipos para ter cuberta toda comarca de Valdeorras no primeiro trimestre, ata chegar aos 11.600 contadores, dos que 8.000 se situarán na capitalidade, O Barco. Ademais, a liña a seguir do proxecto será ter iniciada a instalación dos contadores noutras comarcas da provincia no primeiro trimestre de 2025, grazas ao reforzo do equipo de traballo actual.
Ferramentas dixitais para os concellos do rural
Esta automatización do ciclo da auga dota aos concellos do rural de ferramentas dixitais grazas á cooperación institucional, permitíndolle o acceso a servizos que xestionados de maneira directa sería moi difícil conseguir, especialmente para os concellos máis pequenos.
O obxectivo, tal e como sinala o director da Área de Medio Ambiente da Deputación, Javier Bobe, é que os 81 concellos adheridos ao proxecto OU-intelixente “non só podan beneficiarse da instalación dos contadores, senón que tamén conten coa dixitalización dos sistemas de abastecemento e depuración”.
“OU-intelixente” foi a segunda mellor proposta de España e a primeira de Galicia para dixitalizar a xestión do ciclo da auga na convocatoria dos Fondos Next Generation asociada ao PERTE de dixitalización da auga do Ministerio para a Transición Ecolóxica do Reto Demográfico (MITECO). Este logro supón contar con 7,75 millóns de euros para aplicar as últimas tecnoloxías ao tratamento e control dun recurso básico e estratéxico como é a auga, asumindo a Deputación o 42,52% do financiamento total (5,73 millóns de euros).
Entre os obxectivos concretos do proxecto tamén se inclúe a creación dun centro dixital para a xestión integral da operativa da auga; a implantación dun hub tecnolóxico onde integrar datos e realizar predicións grazas ao Big Data e Intelixencia Artificial, converténdoo nun lugar aberto á cidadanía e un espazo de co-creación co ecosistema emprendedor da provincia.
