Xosé Ramón Fandiño impartirá este xoves a 3 de abril ás 19:00 h a conferencia “Isaac Díaz Pardo. Memoria do compromiso”
A Deputación celebra no Museo de Pontevedra o Día das Artes Galegas, dedicado este ano a Isaac Díaz Pardo, con dúas actividades esta semana dirixidas a lembrar e achegar á sociedade a súa figura: o xoves terá lugar unha conferencia a cargo do escritor e investigador Xosé Ramón Fandiño, e o sábado un obradoiro para nenas e nenos a partir de 6 anos, impartido por Taller Abierto, para o que aínda hai prazas.
O xoves 3 de abril ás 19:00 h, o Edificio Castelao acollerá a conferencia “Isaac Díaz Pardo. Memoria do compromiso”. Xosé Ramón Fandiño abordará os primeiros 16 anos da vida de Isaac Díaz Pardo a carón de seu pai, o escenógrafo Camilo Díaz Baliño, na casa da Tumbona de Santiago de Compostela, de onde tivo que fuxir para escapar das gadoupas fascistas que o perseguían en 1936. Analizará os seus diversos emprendementos como pintor, ceramista, emigrante, ideólogo e creador cultural de espazos contra o baleiro, sempre co seu permanente compromiso co ideario republicano e autonomista, coas e cos inmolados, exiliados e coas causas xustas. Tamén falará do seu último fracaso, ao ser destituído en 2006 da dirección do grupo de empresas Sargadelos, constituído por Isaac e Luís Seoane a partir de 1963, cando no exilio arxentino crearon o Laboratorio de Formas de Galicia.
Xosé Ramón Fandiño Veiga é filólogo e editor. Foi director da Gran Enciclopedia Gallega e é autor de abundante obra como ensaísta, alén de colaborador de diversos medios de comunicación, especialmente da Radio Galega, onde o seu programa Galicia universitaria foi distinguido en 1995 co Premio V Centenario da Universidade de Santiago de Compostela (USC). Participou en varios proxectos do Consello da Cultura Galega, da USC e da Xunta de Galicia, entre os que destaca o comisariado da exposición itinerante dedicada a Castelao en 2011 con motivo do 125 aniversario do seu nacemento e o da exposición Ao pé do prelo. Luís Seoane, editor e artista gráfico (2010), para celebrar o centenario do nacemento deste.
Durante 10 anos foi colaborador de Isaac Díaz Pardo no Instituto Galego de Información, factoría cultural do Grupo Sargadelos. Sobre a figura de Díaz Pardo comisariou as exposicións Con Galiza sempre no horizonte. Camilo Díaz Baliño e Isaac Díaz Pardo en Compostela (2018) e Isaac Díaz Pardo. Espazos contra o baleiro (Museo do Pobo Galego, 2025). Como autor deu ao prelo o libro Isaac Díaz Pardo. Memoria do compromiso (2020).
Obradoiro infantil
O obradoiro “Creatividade e Tradición: Isaac Díaz Pardo e a súa Obra Plástica” desenvolverase o domingo 6 de abril, de 11:30 a 13:00 h, no Edificio Castelao. Trátase dunha actividade creativa na que as nenas e nenos participantes farán un percorrido pola traxectoria artística de Díaz Pardo e explorarán o seu universo plástico para recoñecer os trazos principais do seu estilo. O obradoiro será impartido por Taller Abierto. A inscrición está aberta a través de Whatsapp, no número 617 340 323 de Taller Abierto.
O Día das Artes Galegas foi instituído pola Real Academia Galega de Belas Artes para homenaxear unha figura destacada das nosas artes. Dedicado este ano a Díaz Pardo, en edicións anteriores homenaxeo ao Mestre Mateo, Castelao, Maruja Mallo, Daniel de la Sota, Luis Seoane, Domingo de Andrade, Laxeiro, Martín Codax e Francisco Asorey.
