Manuel Baltar reuniuse esta mañá no Pazo Provincial con José Luis Suárez e, posteriormente, con Luciano Rivero, comprometendo o apoio da institución provincial a varios proxectos sociais e de infraestruturas dentro da aposta da Deputación por cooperar coas administracións públicas
En Monterrei, a Deputación implicarase nun proxecto piloto de axuda a domicilio ou na reparación do firme e mellora do saneamento de diferentes núcleos de poboación. En Cualedro, na cofinanciación do proxecto da aldea modelo de Infesta ou no punto limpo
O presidente da Deputación, Manuel Baltar, reuniuse esta mañá no Pazo Provincial co alcalde de Monterrei, José Luis Suárez e, posteriormente, co alcalde de Cualedro, Luciano Rivero. Nestas dúas xuntanzas de traballo, os rexedores prantexaron ao presidente da Deputación actuacións de mellora nos seus respectivos municipios, acadando o compromiso de implicación da institución provincial dentro da aposta da Deputación por cooperar coas administracións, co obxectivo de mellorar os servizos dos veciños do rural.
En concreto, en Monterrei, a Deputación implicarase nun proxecto piloto de asistencia de axuda no fogar; na renovación do abastecemento e saneamento de Medeiros; na reparación dos firmes dos núcleos de Guimarei, Vilaza, San Cristovo, Mixós e A Magdalena, ademais da mellora do saneamento de Flariz.
En Cualedro, Manuel Baltar e Luciano Rivero acordaron o compromiso para avanzar no proxecto da aldea modelo de Infesta -en cofinanciación coa Consellería de Medio Rural-; na mellora dos accesos aos usuarios de parapente na serra do Larouco e no punto limpo para os concellos de Trasmiras, Monterrei e Cualedro -co cofinanciamento da Consellería de Medio Ambiente-.
