Ariansis Reyes e Frank González chegan coas súas pinturas e as cores do Caribe á institución provincial
O presidente provincial, Luis Menor, visitou acompañado dos artistas esta mostra, da que destacou que “amosa o carácter emigrante da nosa provincial que agora é acolledora de persoas quue veñen aquí como antes marcharon os nosos pais e avós, e desde logo na Deputación estamos encantados de axudar a visibilizar a súa arte e a súa realidade”
A Deputación decidíu hai pouco máis dun ano dedicar parte das paredes do Pazo Provincial a espazo expositivo onde ofrecer unha mostra da capacidade creativa existente na nosa provincia. E agora a oferta chega directamente dende Cuba, con dous artistas que buscan asentarse vitalmente entre nós e ao tempo ofrecer o seu traballo pictórico. Precisamente, esta mañá o presidente provincial, Luis Menor, visitou acompañado dos artistas e do director do Centro Cultural Marcos Valcárcel, Francisco González, esta mostra, da que destacou que, en palabras de Menor, “amosa o carácter emigrante da nosa provincial que agora é acolledora de persoas quue veñen aquí como antes marcharon os nosos pais e avós, e desde logo na Deputación estamos encantados de axudar a visibilizar a súa arte e a súa realidade”.
A exposición titulase “Aquí e agora” e ven a significar un paso máis na traxectoria creativa de Ariansis Reyes e Frank Elia González, unha parella na vida cotiá e dous proxectos pictóricos diferentes.
Ariansis Maricel Reyes Jordan (1991, Manzanillo-Granma-Cuba) é unha artista graduada na Academia Profesional de Artes Plásticas “Carlos Enrique Gómez” de Manzanillo. As súas obras son unha terapia introspectiva que, a través de cores, contrastes, pinceladas e figuras en tecido expresan emocións complexas e sentimentos persoais. “A miña obra non é só un proceso de curación persoal senón tamén unha crítica ás normas sociais que impoñen ideais de beleza e comportamento”.
Frank Elia González Martínez (1990, Manzanillo-Granma-Cuba) graduouse na mesma Academia Profesional de Artes Plásticas e ao concluír os seus estudos, traballou temporalmente no Taller de Libre Creación da súa localidade natal. Onda os e as artistas da cidade, participou en diversos proxectos e exposicións. A súa obra está rexida pola memoria, coa que trata de construír unha identidade propia onda a súa contorna. “Ante o lenzo eu enfróntome ás miñas contradicións e é aí onde desenvolvo as miñas ideas e os meus proxectos”.
As súas obras poden verse na planta principal do Pazo provincial, sede da Deputación de Ourense.
