A conferencia do escritor terá lugar o próximo xoves, 24 de outubro, ás 19:00 horas, no Salón de Plenos do Pazo provincial coa presenza do vicepresidente Rafa Domínguez. Poderá seguirse por streaming a través de www.depo.gal
César Antonio Molina colle o testemuño de José María Barreiro e Antón Pulido, artistas cos que arrancou o ciclo de conferencias “Conversas con arte” en abril e maio
A Deputación de Pontevedra convida a César Antonio Molina a participar no seu ciclo de conferencias “Conversas con arte”. O encontro co escritor terá lugar o próximo xoves, 24 de outubro, ás 19:00 horas, no Salón de Plenos do Pazo provincial do organismo coa presenza do seu vicepresidente Rafa Domínguez. César Antonio Molina colle o testemuño de José María Barreiro e Antón Pulido, artistas cos que arrancou o ciclo de conferencias “Conversas con arte” en abril e maio.
“Conversas con arte” trátase dunha aposta persoal de Domínguez, quen a través do Museo de Pontevedra quere difundir as diferentes manifestacións artísticas que xurdiron e xorden na provincia e en Galicia, así como as grandes personalidades vencelladas a diferentes movementos nadas ou relacionadas coa nosa terra. Deste xeito, o ciclo que arrancou da man de José María Barreiro en abril e continuou en maio da man de Antón Pulido, ten previsto seguir nos vindeiros meses con outras figuras e artistas de impacto internacional con vínculo coa provincia e Galicia. A conferencia de César Antonio Molina poderá seguirse por streaming a través da páxina web da Deputación de Pontevedra www.depo.gal e, ademais, será gravada para poder emitirse en formato vídeo e pódcast a través das plataformas Youtube e Spotify.
O escritor, tradutor e profesor César Antonio Molina (A Coruña, 1952) é licenciado en Dereito e en Ciencias da Información, así como doutor en Literatura. Foi profesor de Teoría e Crítica Literaria na Universidade Complutense e de Humanidades na Universidade Carlos III. Tamén foi profesor convidado en varias universidades americanas e europeas, e é Doutor Honoris Causa pola Universidade La Oriental de Nápoles. Comezou como xornalista en La Voz de Galicia, exerceu como director adxunto do Diario 16, e escribe en numerosos medios de comunicación de tirada nacional. Dirixiu o Círculo de Belas Artes de Madrid, o Instituto Cervantes, a Casa do Lector e foi ministro de Cultura. É autor de máis de medio centenar de libros e ten, ademais, as máis altas condecoracións de España, Francia, Italia, Portugal, Serbia e Chile, así como a medalla Castelao de Galicia.