A conferencia, enmarcada no Ciclo Aida Fernández Ríos, será impartida en formato webinario por Aurora Grandal, profesora titular de Paleontoloxía no Instituto Universitario de Xeoloxía Isidro Parga Pondal da Universidade da Coruña
O ciclo de conferencias Aida Fernández Ríos, que promoven a Deputación de Pontevedra e a Real Academia Galega de Ciencias fará este xoves un percorrido pola historia das escavacións paleontolóxicas en Galicia. A conferencia, que será impartida en formato webinario a partir das 19:00 horas, correrá a cargo da profesora titular de Paleontoloxía do Instituto Universitario de Xeoloxía Isidro Parga Pondal da Universidade da Coruña (USC), Aurora Grandal. A preinscrición está aínda aberta e pode realizarse a través desta ligazón.
En “Escavacións paleontolóxicas en Galicia” Aurora Grandal analizará o interese que os seres humanos teñen polos fósiles desde a prehistoria, tempo no que probablemente aínda descoñecían o que significaban aqueles obxectos de formas curiosas e non sendo ata o Renacemento cando se recoñeceu a súa verdadeira natureza. Desta maneira, debullará como, seguindo un camiño moitas veces tortuoso, chegamos á época actual e estudiamos os fósiles dos nosos propios antepasados, descubrindo a apaixonante historia da nosa especie e o seu paso pola Terra. No seu repaso non faltarán os estudos sobre o descubrimento de fósiles en Galicia, non sempre restos humanos, pero que en moitos casos tamén falan da nosa historia.
Trala charla a cargo de Aurora Grandal, as conferencias dirixidas á cidadanía en xeral rematan o vindeiro 6 de xuño con dúas conversas: “Os biomateriais no combate do cancro”, a cargo de Bárbara Blanco, investigadora Ramón y Cajal na Universidade de Santiago, e “Células CAR-T: novo paradigma no tratamento do cancro” a cargo de Mariona Baliu, responsable do Centro de Fabricación de Terapias Avanzadas de Galicia de Galaria.
Conferencias dirixidas aos centros educativos
As conferencias dirixidas á cidadanía en xeral compleméntase con outras dirixidas a centros educativos. Neste eido, o 13 de xuño, ás 11:30 horas no IES de Salvaterra, terá lugar a conferencia “O impacto das substancias cotiás no noso material xenético” a cargo de Vanessa Valdiglesias, profesora titular de Xenética e coordinadora do Grupo de Investigación en Nanotoxicoloxía e Toxicoloxía Xenética do Centro de Investigacións Científicas Avanzadas da Universidade da Coruña. Finalmente, o bloque de charlas en centros educativos da provincia completarase con outra actividade centrada nos “Medicamentos personalizados” a cargo de Carmen Álvarez, catedrática de Tecnoloxía Farmacéutica e académica da Real Academia Galega de Ciencias e da Real Academia de Farmacia de Galicia.