O programa provincial é un dos cinco finalistas na categoría de Podcast en Lingua Cooficial, e os gañadores coñeceranse o próximo 12 de marzo
O proxecto Aquí faltan páxinas da Deputación de Pontevedra acaba de ser seleccionado polos Premios Ondas Globais do Podcast como un dos seus cinco finalistas na categoría de Podcast en Lingua Cooficial na cuarta edición dos galardóns. A Deputación celebra este recoñecemento a un programa, que organiza en colaboración con O Cable Inglés, que busca poñer en valor e recuperar historias de mulleres vinculadas á provincia e relevantes pero que non sempre acadaron un espazo relevante nos libros de historia.
No marco de Aquí faltan páxinas, que leva ás súas costas dúas edicións, a Deputación homenaxea cada mes do ano unha muller (na edición de 2024, a Carmen Babiano, Inmaculada Paz Andrade, Avelina Valladares, Placeres Castellanos, Mary Quintero, Urraca I de León, María Pardo, Mercedes Ruibal, Urania Mella e María Araújo) ou un grupo de mulleres (como as Leiteiras de Pontevedra ou as Madriñas de Redondela), organizando un coloquio e publicando un podcast dedicado a elas, explicando as súas traxectorias e nutríndose dos testemuños recollidos no coloquio.
Aquí faltan páxinas compite na súa categoría con outros catro podcasts: MARE, de EITB Podkast; La turra, de La Manchester e SomEVA / 3Cat; Borja, de València al Vaticà, de La República Independiente de la Radio y À Punt Pòdcast; e Gent de merda, de Radio Primavera Sound. Os gañadores dos Premios Ondas Globais do Podcast coñeceranse o 12 de marzo durante a emisión do programa ‘La Ventana’ e a gala de entrega celebrarase na primavera.
