O organismo provincial avanza na dixitalización coa integración neste servizo que permite á veciñanza consultar nun mesmo espazo as comunicacións que emiten as institucións públicas, sen necesidade de desprazarse a oficinas físicas nin consultar as sedes electrónicas de cada administración
A Deputación de Ourense avanza no seu compromiso coa dixitalización coa integración na Carpeta Cidadá da Administración Xeral do Estado, un servizo que permite á veciñanza consultar nun único espazo notificacións, expedientes, avisos e alertas de distintas institucións simultaneamente. O goberno provincial xa ten activo o servizo telemático, no que os habitantes de toda a provincia poderán consultar de maneira sinxela e áxil os seus documentos relacionados neste caso coa Deputación de Ourense.
Unha das principais vantaxes do servizo é que o cidadán pode consultar nunha mesma interface comunicados de diversas institucións, entre as que agora se atopa a Deputación. Deste xeito, os usuarios non teñen que acceder á sede electrónica de cada un dos organismos de forma independente, senón que a través dun único punto poden visualizar todas as xestións pendentes coas administracións. Ademais, non terán que desprazarse ás oficinas da Deputación para consultar o estado dos seus expedientes.
| A Carpeta Cidadá oferece servizos telemáticos completos desde calquera ordenador con acceso a Internet e en calquera momento; tanto de xestións que requiren acreditación de identidade como de servizos que non a precisan. |
Quen pode ser usuario
| Calquera persoa interesada nos servizos que poderán encontrar no apartado “Tramitar por internet” da Carpeta Cidadá pode solicitalo sen requerimento algún. Os servizos que requiren acreditación da identidade poden ser utilizados por aquelas persoas físicas, maiores de idade, que sexan terceiros da Deputación. |
