O proxecto de actuación na EP-8404 está moi avanzado e consiste na mellora do firme e seguridade viaria da estrada provincial
A deputada de Infraestruturas Públicas, Mobilidade e Contratación, Isabel Couselo, realizou unha visita á estrada “co obxectivo de analizar de primeira man a súa situación para que quede todo ben recollido no proxecto”
A deputada de Infraestruturas Públicas, Mobilidade e Contratación, Isabel Couselo, acaba de visitar en Cuntis a estrada provincial EP-8404 entre Piñeiro e Arcos na que a Deputación de Pontevedra investirá máis de 400.000 euros na súa mellora. A visita tiña por obxectivo “analizar de primeira man a situación da estrada para que quede todo ben recollido no proxecto” que, tal e como avanzou a deputada, “está moi avanzado” e permitirá “mellorar o firme e a seguridade viaria de todo o conxunto da estrada provincial”.
A EP-8404 entre Piñeiro e Arcos ten unha lonxitude de 3416 metros. Nestes momentos non ten a capacidade portante adecuada e mediante a actuación prevista preténdese realizar un asfaltado que cubra o estado deficiente da vía. Deste xeito realizarse unha reparación de todo o treito da estrada, mediante a execución de saneos e o fresado da capa de rodadura e, posteriormente, cun recredido do firme existente mediante formigón en quente.
A actuación completarase cun paquete de medidas destinadas á mellora da seguridade viaria da estrada provincia. Deste xeito, ademais da mellora do firme, repoñerase a sinalización horizontal e vertical co fin de salvagardar a debida prestación do servizo público viario.
