O espectáculo de teatro para todos os públicos poderá verse ás 17:00 horas no salón parroquial de Santa Eulalia
+Escénicas é un novo circuíto da institución provincial, dotado con 150.000 euros, cunha completa programación de teatro e danza en 49 concellos da provincia ata marzo de 2025
A Deputación de Pontevedra leva este luns 23 de decembro o circuíto +Escénicas ao concello de Silleda co espectáculo de teatro “O autoestopista intergaláctico”, de Pistacatro. A función comezará ás 17:00 horas no salón parroquial de Santa Eulalia e enmárcase no novo circuíto da institución provincial que está a espallar unha completa programación de teatro e danza en 49 concellos da provincia ata marzo de 2025 cun orzamento de 150.000 euros.
“O autoestopista intergaláctico” é un espectáculo de ciencia ficción absurdo onde o artista Aitor Garuz emprega o clown e o transformismo, mudanzas de vestiario e de personaxes cómicos, para dar pé a escenas divertidas e absurdas. O espectáculo arranca cun burato espazo-temporal entre varias dimensións, do que aparecen personaxes singulares dotadas de poderes que desafían a lei da gravidade con equilibrios imposibles, teñen control dos obxectos malabares ou paralizan o público con monólogos que producen gargalladas coas que esmendrellarse.
Co circuíto +Escénicas, a Deputación busca dar resposta á demanda que o sector profesional vén facendo desde fai máis de 15 anos. A cada concello correspóndelle unha achega máxima de 3.400 euros para financiar os espectáculos propostos, incluídos nun amplo catálogo de espectáculos de danza e teatro posto á súa disposición e dispoñible no sitio web da Deputación de Pontevedra.
