Mercedes Peón actuará na Praza Maior da Cañiza ás 22:30 horas dentro da programación do +Música, mentres que a proxección da longametraxe “Xustiza artificial” terá lugar no recinto da muralla de Salvaterra de Miño ás 22:00 horas dentro do Ciclo Mestre Mateo
A Deputación de Pontevedra leva este martes 12 de agosto ao Condado-Paradanta dúas citas coa cultura galega. Será a través dun concerto de Mercedes Peón, unha das artistas que forman parte do catálogo do programa +Música, e a proxección da longametraxe “Xustiza artificial”, de Simón Casal, unha das que se ofertan no marco do Ciclo Mestre Mateo. A actuación musical da recoñecida artista terá lugar na Praza Maior da Cañiza ás 22:30 horas, mentres que o filme se proxectará no recinto da muralla de Salvaterra de Miño ás 22:30 horas.
Mercedes Peón é unha das máis carismáticas compositoras, vocalistas e instrumentistas galegas. No escenario da Cañiza viaxaremos con ela polos momentos máis destacados dos seus 20 anos de traxectoria profesional. Pola súa banda, Simón Casal propón unha cinta de intriga na que un sistema de intelixencia artificial do goberno español promete automatizar e despolitizar o proceso xudicial. O desenvolvemento do proxecto desvelará unha conspiración para controlar todo o país.
O concerto de Mercedes Peón é unha das 78 actuacións de +Música que se celebrarán entre os meses de maio e decembro nos 59 concellos de menos de 50.000 habitantes da provincia. Este programa provincial ten un orzamento de 700.000 euros, 100.000 euros máis que na pasada edición, cos que a Deputación aboa os custos de caché dos espectáculos e impulsa a reputación de Pontevedra como un destino cultural de primeiro nivel. A través de +Música, a institución provincial aposta pola descentralización da cultura e a programación de actos culturais de calidade.
O Ciclo Mestre Mateo, promovido pola Academia Galega do Audiovisual e a Deputación de Pontevedra, ten a finalidade de achegar as longametraxes de ficción e documentais finalistas dos premios do audiovisual galego aos concellos da provincia. A programación desta nova edición do Ciclo Mestre Mateo chegará tamén aos concellos de Marín, Mondariz e Vilanova de Arousa, e ademais da proxección de “Xustiza artificial”, haberá proxeccións de “Honeymoon”, de Enrique Otero, “As Neves”, de Sonia Méndez e “+Cuñados”, de Luis Avilés, así como dos documentais “Prefiro condenarme”, de Margarida Ledo, “Aurora”, de Area Erina, “Salvaxe, salvaxe”, de Emilio Fonseca, e “Filmei paxaros voando”, de Zeltia Outeiriño.
