Trátase dunha actividade organizada pola institución provincial en colaboración con Polo Correo do Vento co gallo das Letras Galegas que se desenvolverá na Casa da Cultura Manuel Lueiro Rey do Grove ás 11:30 horas
“Cantareiras, poesía popular nas Letras Galegas” percorrerá 35 concellos da provincia ata finais de xullo
A Deputación de Pontevedra leva este xoves, 10 de xullo, ata O Grove a xeira de contacontos ‘Cantareiras, poesía popular nas Letras Galegas’ organizada en colaboración coa compañía Polo Correo do Vento co gallo das Letras Galegas. A actividade terá lugar ás 11:30 horas na Casa da Cultura Manuel Lueiro Rey e continuará ao longo deste mes de xullo ata completar as 35 citas programadas destes obradoiros nos concellos da provincia.
Con esta actividade, a Deputación ten por obxectivo divulgar entre a infancia o papel fundamental das cantareiras para a conservación e difusión da lingua galega. Deste xeito, os obradoiros percorren a biografía destas mulleres (personificadas nalgunhas figuras como as de Adolfina e Rosa Casás Rama, de Cerceda, Eva Castiñeira Santos, de Muxía, e Manuela Lema e mais Prudencia e Asunción Garrido Ameixenda, integrantes das Pandeireteiras de Mens, de Malpica) dun xeito ameno e participativo. Durante a actividade tamén se interpretarán as pezas que cantaban estas mulleres, ademais de pezas propias de cada unha das localidades onde se desenvolvan as accións, e concluirá cun obradoiro de debuxo no que os nenos e nenas terán que realizar unha caricatura dunha pandeireteira.
Despois de visitar O Grove este xoves e tras pasar este mércores por O Porriño e Gondomar e percorrer xa Vila de Cruces, Barro, Bueu, Vilanova de Arousa, Moaña, Cerdedo-Cotobade, As Neves, Tomiño, Catoira, Poio, Redondela, Mos, Salvaterra de Miño, Ponteareas, Portas e Vilagarcía de Arousa, “Cantareiras, poesía popular nas Letras Galegas” chegará neste mes de xullo ata O Rosal, Oia, Cuntis, Pontecesures, Pazos de Borbén, Mondariz, Cambados, Meaño, Ribadumia, Vilaboa, Moraña, A Lama, Ponte Caldelas, Cangas, Soutomaior e Mondariz-Balneario.
